Како што пишува Би-би-би, Оливија и Амелија ги зазедоа првите две места меѓу девојчињата трета година по ред, додека Ајла падна од третото место и беше заменета со Лили.
Листата го објавува Канцеларијата за национална статистика (ОНС), која ја составува врз основа на податоци од матичните книги на родени.
Новите имиња кои влегоа во првите 100 за девојчиња се Елоиз, Нора, Мила, Роза, Атена, Сара и Зои. Новите машки имиња се Остин, Нејтан, Вини и Јахја.
Мухамед го задржа првото место како најпопуларно машко име, со 5.721 бебиња кои го добиле ова име. Во пет од девет региони во Англија тоа било најпопуларно, додека во Велс се рангираше на 57-мо место.
На листата се најдоа и други варијации на името: Мохамед е на 21-во место со 1.760 момчиња, а Мохамад е на 53-то место со 986.
Околу 2,61 девојчиња во Англија и Велс го добиле името Оливија, што е највисок број во седум англиски региони и Велс.
СЈ Струм, експерт за бебиња и авторка на „Завист кон имињата на бебињата“, кажа дека не е изненадена што Оливија повторно го освоила првото место, но е „малку разочарана“.
„Тоа е име што сите го сакаат – во 90-тите беше Луиз, во 80-тите беше Сара“, додава Струм. „Оливија е одличен избор како безвременско име, но сега се раѓаат сè помалку девојчиња со тоа име. Луѓето бараат поуникатни имиња“.
Таа кажа дека „традиционалните омилени“ секогаш се на листата, но под нив се имиња под влијание на поп-културата. Примери се Марго, по холивудската актерка Марго Роби, и Отис, лик од популарната серија на Нетфликс „Сексуално образование“.
„Родителите црпат инспирација од светот околу нив и ги следат своите интереси“, објаснува Струм. Но, кога станува збор за имињата на момчињата, таа смета дека британските родители претпочитаат „по традиционални имиња“ во обид да им дадат добар почеток во нивната кариера.
Таа додава дека имињата што биле популарни пред повеќе од сто години се враќаат. „Артур сега е во првите 10 имиња – пред 15 години ова не би било случај“.
Ова е она што Клер Грин, друг експерт за именување, го нарекува правило од 100 години.
„Ги избираме имињата така што се доволно стари за да не бидат имиња на баби и дедовци, туку на нивните генерации пред нив – тие се надвор од живо сеќавање и се дел од љубовта кон класичниот стил“, вели таа. Затоа би можеле да видиме враќање на имиња како Сузан или Роџер во следните генерации, додава таа.
Имињата поврзани со природата се исто така на листата на најпопуларни имиња, со Лили, Попи и Ајви во првите 10. Грин вели дека ваквите имиња се „безвременски“ и се меѓу првите 100 со години.
Имињата за момчиња што се користеле помалку од пет пати во 2024 година се Авео, Катберт, Криспин и Бекам. Имињата за девојчиња со помалку од пет употреби се Сицилија, Еверест, Орхидеја и Поем, заклучува Би-би-си.
