Милановиќ тврди дека изјавите на Хадад разоткриле поширок политички проект на Франција и нејзините западни сојузници во кој Хрватска била сведена на секундарна, „корисна“ улога, на нејзина сопствена штета.
„Делегираниот француски министер за Европа, Бенџамин Хадад, кој вчера беше топло пречекан од премиерот Андреј Пленковиќ, конечно ни објасни зошто Франција ѝ продаде на Србија помодерен и понапреден модел на „рафал“ и, што е уште поважно, каква улога ѝ намениле на Хрватска во ова.
„Франција, Хрватска и другите партнери во Европската Унија и НАТО делат стратегиски интерес во регионот, а особено во Србија, која постепено ја ослободуваат од зависноста од Русија и ги зајакнуваат нејзините врски со западните земји. Во овој контекст, Хрватска има корисна улога, на пример, со обезбедување алтернативни патишта за снабдување со нафта и гас за своите соседи, вклучително и Србија. Набавката на одбранбена опрема од Франција или други западни земји, како што се Соединетите Американски Држави, за земји надвор од НАТО ја следи истата логика“, кажа министерот.
Значи, францускиот министер всушност потврди дека проектот за привлекување на Србија кон Западот се спроведува зад грб на Хрватска и на штета на хрватските национални интереси.
Францускиот интерес е да ги продава своите авиони на секој што сака да ги купи, со што ќе заработи пари и ќе го прошири кругот на своите „стратегиски партнери“. Очекуван е и интересот на Србија да купи најсовремени авиони и да постигне најдобра можна соработка со Франција. Клучното прашање е – каков е интересот на Хрватска во сето ова?
Сега е сигурно дека хрватската влада не ги заштитила хрватските интереси на никаков начин кога склучувала договори и купувала француски „рафали“, и не ѝ било гајле дали Франција ќе продава исти или дури и понапредни модели на авиони на некоја од нашите соседни земји надвор од НАТО. И дека токму тоа се случило, дека Франција се согласила со нашите соседи да продаде понапреден модел на авион, се потврдува и со брзата надградба на хрватските „рафали“, која се спроведува ни по една цела година откако се испорачани.
Во секој случај, Хрватска не треба да се сведе само на „корисна улога“ за привлекување на Србија кон Западот, улога наменета за Хрватска од Франција, а очигледно прифатена од хрватската влада! Клучното прашање е како дошло до тоа:
- Ако хрватската влада не знаела или не прашувала за идните француски планови во врска со рафалите, очигледно дејствувала аматерски и неодговорно.
- Ако хрватската влада знаела дека Французите ќе продадат понапреден модел на авион на Србија, тогаш дејствувала покорно и на штета на хрватските национални и безбедносни интереси. Затоа го прашувам премиерот – дали воопшто знае што нашите „стратегиски партнери“ всушност продале на Србија, и ако знае, што прави во врска со тоа?
Бидејќи хрватската влада се согласи да купи и 18 француски самоодни хаубици ЦЕЗАР 2, се поставува прашањето дали премиерот Андреј Пленковиќ побарал од Франција, како „стратегиски партнер“ на Хрватска, да не продава исти или дури и понапредни хаубици на соседните земји кои не се членки на НАТО?
Примерот со купувањето на француските „рафали“ покажа како секоја земја пред сè се грижи за својот интерес и заработува пари.
Затоа го повикувам премиерот Андреј Пленковиќ – кој самиот се назначи за шеф на Меѓуресорската комисија за развој и зајакнување на одбранбените капацитети и одбранбената индустрија во Хрватска – конечно да престане да слуша диктати и да почне прво да ги зема предвид хрватските интереси и да го услови купувањето на воена опрема со учество во нејзиното производство и одржување, како што прават сите други земји на НАТО и Европската унија. Дека ова е можно и дека другите земји постапуваат на овој начин, се докажува со примерот со купувањето на германските тенкови „леопард“, при што земјите купувачи ги вклучија националните индустрии во производството и одржувањето на тие тенкови. Хрватска повторно не се вклучи“, напиша Милановиќ на Фејсбук.
