Низ историјата, конфликтите обично завршувале кога едната или двете страни достигнувале исцрпеност, воена или економска, рече Мерц. „Очигледно е дека сè уште сме далеку од тоа во оваа војна“, изјави тој.
Германскиот канцелар, кој ја презеде функцијата претходно овој месец, инсистира на продолжување на поддршката за Украина. Војната не се однесува само на територијалниот интегритет на Украина, изјави тој. „Политичкиот поредок што го воспоставивме со Русија по 1990 година е доведен во прашање. Ние сме под закана и се браниме од тоа“, додаде тој.
Мерц рече дека заедничките напори на Европската Унија, Велика Британија и САД во изминатите три недели, со цел да се изврши притисок врз Русија да се согласи на примирје, не биле успешни.
„Сепак, од самиот почеток немав илузии дека ова ќе се случи многу наскоро“, рече Мерц, додавајќи дека Русија во моментов нема интерес за прекин на огнот. „Следствено, ова значи дека Украина мора да продолжи да се брани и дека ние мора да ги засилиме нашите напори за да може Украина да се брани“, заклучи канцеларот.
