Говорејќи синоќа на конгресот на Христијанско-социјалната унија (ЦСУ) во Минхен, Мерц изјави дека периодот на таканаречената „Пакс Американа“, поредок воспоставен по Втората светска војна во кој Соединетите Американски Држави ја гарантираа безбедноста на Европа, во голема мера е завршен.
Тој ги предупреди европските држави да не сметаат дека американската надворешна политика по претседателот на САД, Доналд Трамп, ќе се врати на старата предвидливост, нагласувајќи дека стратегиските приоритети на Вашингтон веќе со години се менуваат.
„Трамп не се појави преку ноќ, ниту пак американската политика ќе се промени преку ноќ“, рече Мерц, додавајќи дека идното американско раководство би можело да покаже уште помало ниво на посветеност кон европската безбедност.
Германскиот канцелар ги повика европските земји во поголема мера да се потпрат на сопствените капацитети и да ги зајакнат независните одбранбени способности и стратешката автономија во рамките на Европа.
Воедно предупреди и на опасноста од преголеми отстапки кон Москва во обидите да ѝ се стави крај на руската војна против Украина, истакнувајќи дека политиката на попуштање само би ги зајакнала амбициите на Кремљ.
Мерц рече дека рускиот претседател Владимир Путин нема да застане на Украина и предупреди на обидите за прекројување на европските граници и повторно воспоставување контрола врз поранешните советски територии, што, како што нагласи, претставува долгорочна закана за безбедноста на Европа.
