Претседателката Клаудија Шејнбаум веќе покажа спремност да се откаже од често критикуваната стратегија „прегратки, а не куршуми“ на поранешниот претседател Андрес Мануел Лопез Обрадор, која се фокусираше на решавање на социјалните корени на криминалот, а не на директно соочување со моќните мексикански картели.
Владата допрва треба официјално да го соопшти формирањето на Националната оперативна единица (УНО), но нејзиното постење веќе е јавна тајна меѓу поранешните припадници на федералната полиција, каде министерот за безбедност Омар Гарсија Харфуч ја почнал својата кариера и од чии припадници ќе биде формирана. УНО ќе биде под негова директна команда.
Единицата почнала со формирањето набрзо по преземањето на должноста на Шејнбаум. Сега има 250 членови и се очекува до крајот на годината да има 800. УНО ќе има три гранки распоредени низ Мексико.
Нејзините сегашни членови се главно од поранешната федерална полиција и членови на тимот за специјални операции кој Гарсија Харфуч го создал додека бил шеф на полицијата на Мексико Сити. Повеќето претходно биле на обука кај безбедносните сили на САД, Колумбија, Шпанија или Франција.
Безбедносниот аналитичар Давид Сауседо, кој разговарал со луѓе кои се придружиле на единицата, кажа дека верува дека главната цела на Харфуч е да има оружени сили кои ќе му овозможат да ги исполни барањата на Вашингтон.
Во понеделникот, додека Харфуч бил на состанок во Вашингтон, министерството за безбедност објавило повик до дипломираните студенти да бидат „првата генерација истражни и разузнавачки агенти“, соопштувајќи дека тие ќе бидат дел од специјализирана група за јакнење на безбедноста.
