Во писмото до Трамп, Мадуро ги отфрли американските тврдења дека Венецуела игра голема улога во трговијата со дрога, тврдејќи дека само пет отсто од наркотиците произведени во Колумбија минувале низ Венецуела, од кои венецуелските власти пресретнале и уништиле 70 отсто.
„Претседателе, се надевам дека заедно ќе можеме да ги победиме лагите кои ги нарушија нашите односи, кои мора да бидат историски и мирни“, напиша Мадуро во писмото. „Овие и други прашања секогаш ќе бидат отворени за директна и отворена дискусија со вашиот специјален пратеник Ричард Гренел за да се надмине медиумската врева и лажните вести“.
Тој рече дека Гренел брзо помогнал во решавањето на претходните обвинувања дека Венецуела одбива да ги врати мигрантите. „До денес тој канал функционира беспрекорно“.
Напад без докази
Писмото на Мадуро е датирано на 6 септември, четири дена по американскиот напад врз бродови за кои администрацијата на Трамп тврдеше, без докази, дека превезуваат шверцери. Во нападот загинаа 11 лица за кои Трамп тврди дека биле членови на бандата Трен де Арагуа и дека биле вклучени во трговија со дрога.
Белата куќа не одговори веднаш на барањето за коментар.
Трамп го засили притисокот во саботата, предупредувајќи во објава на својата страница на Трут соушл дека Венецуела мора да го прифати враќањето на сите затвореници за кои рече дека Венецуела ги принудила да одат во Соединетите Држави или ќе плати „незамислива цена“.
Воен притисок
Трамп во петокот го објави најмалку третиот напад врз наводни бродови за дрога од Венецуела, како дел од големото американско воено распоредување во јужниот дел на Карибите, кое вклучува седум воени бродови, нуклеарна подморница и борбени авиони Ф-35.
Во нападот загинаа „тројца мажи нарко терористи кои биле на бродот“, рече Трамп, но не даде докази.
Администрацијата на Трамп е поделена во врска со Венецуела, при што државниот секретар Марко Рубио и министерот за одбрана Пит Хегсет ја водат кампањата за притисок врз Мадуро, додека Гренел, кој беше директор на националната разузнавачка агенција за време на првиот мандат на Трамп, е наклонет кон дипломатијата.
Канали за комуникација
Во своето писмо, Мадуро рече дека ќе продолжи да комуницира со Гренел, кој помогна да се организираат летовите за депортација, некои директно во Каракас, други преку Хондурас.
Еден официјален претставник изјави дека повеќе од 8.000 Венецуелци се депортирани од САД преку овој пат досега.
Гренел, исто така, соработуваше со Мадуро за да обезбеди ослободување на седум американски државјани, вклучувајќи го и ветеранот од воздухопловните сили на САД, Џо Сент Клер, кој беше ослободен во мај и чие семејство тврди дека тој е неправедно притворен во Венецуела од ноември 2024 година.
Стручна анализа
„Мадуро очигледно се обидува да отвори канали за комуникација“, изјави Џеф Ремзи од аналитичкиот центар на Атлантскиот совет. „Прашањето за Белата куќа е како да се добие победа овде? Мадуро нема да ја понуди својата глава на сребрен послужавник на венецуелската опозиција или на Американците“.
Ремзи вели дека зголемувањето на бројот на американски бродови има за цел да ја охрабри опозицијата да го собори Мадуро, но дека оваа стратегија е неуспешно испробана со децении.
Хенри Зимер, соработник во Центарот за стратешки и меѓународни студии, рече дека Трамп има изразена аверзија кон вклучување во кризи и дека се поверојатни насочени напади.
„Мислам дека Трамп не сака војна, а Мадуро секако не сака војна“, рече Зимер. „Но, колку повеќе сили има во регионот, толку повеќе можности има за погрешна пресметка. Ризикот е дека ќе завршиме во ситуација каде што и Мадуро и Трамп ќе чувствуваат дека не можат да се повлечат.“
