Лукашенко истакна дека политиката на обновување на односите со Вашингтон мора да се базира исклучиво на интересите на Белорусија. „Без сомнение, нашата политика на обновување на односите со САД мора да се базира исклучиво на белоруските интереси… Ќе чекаме нивни големи предлози, голем договор… Подготвени сме да склучиме голем договор со нив“, порача тој.
Тој додаде дека е подготвен за преговори. „На едната страна од вагата се нивните прашања, барања и тврдења; на другата страна се нашите прашања и тврдења. Дали ќе работиме на нив? Ајде да го направиме тоа. Подготвени сме за тоа.“ Иако кажа дека е задоволен од предлогот на американскиот претседател Доналд Трамп, тој истакна дека интересите на Белорусија мора да се земат предвид.
Коментирајќи го ставот на Вашингтон за постигнување мир во Украина, сојузникот на Кремљ кажа дека Украина „мора да постои како суверена, независна и мирна држава“.
„Ние сме за запирање на војната сега. Во спротивно, оваа независна суверена држава (Украина) ќе исчезне“, оцени Лукашенко. „Ако Американците сакаат да го решат конфликтот во Украина и гледаат улога за нас во тоа, дури и мала, ние сме подготвени да учествуваме. Ние го кажавме нашиот став: мир, мир и само мир“. Тој, исто така, ги спомена своите неодамнешни средби со рускиот претседател Владимир Путин, тврдејќи дека руското раководство е посветено на мирот.
Лукашенко предупреди дека „никакви ракети „томахавк“ нема да решат ништо“ и дека нивната употреба само ќе ја ескалира ситуацијата кон нуклеарна војна.
„Претседателот Доналд Трамп го разбира ова подобро од кој било друг, бидејќи не брза да го предаде ова смртоносно оружје за длабински напади на руска територија, на што смета претседателот Зеленски“, додаде тој.
Овие изјави доаѓаат по низа дипломатски активности. Во јуни Лукашенко во Минск се сретна со Кит Келог, специјалниот претставник на Доналд Трамп за Украина, по што белорускиот режим ослободи 14 политички затвореници.
Украинскиот претседател Володимир Зеленски неодамна разговараше со Трамп по телефон во два наврати, а медиумите известуваат дека една од темите била евентуалното добивање крстосувачки ракети „томахавк“. Кремљ изрази „сериозна загриженост“ за можноста, додека Зеленски кажа дека притисокот од таквото оружје би можел да помогне во завршувањето на војната.
