Израел денес врши големи воздушни напади врз јужните предградија на Бејрут под контрола на Хезболах и врз пошироки области на Либан, како одговор на нападот со дрон и ракети од Хезболах, во кој, според либанското Министерство за здравство, загинаа 31 лице.
Соединетите Американски Држави и Израел во саботата го нападнаа Иран, поттикнувајќи возвратни напади на Техеран низ поширокиот регион. Хезболах, кој во 1982 година беше основан од Иранската револуционерна гарда, тврди дека нивниот напад е одмазда за „чистата крв“ на иранскиот врховен лидер ајатолах Али Хамнеи, убиен во саботното бомбардирање. Хезболах смета дека Израел е одговорен за ескалацијата на настаните.
По состанокот на либанската влада, премиерот Наваф Салам изјави дека државата ги отфрла сите воени акции започнати од либанска територија „надвор од рамките на нејзините легитимни институции“. Затоа „мора итно да се забранат сите безбедносни и воени активности на Хезболах бидејќи се надвор од законот, а истовремено таа исламистичка организација е должна да ѝ го предаде оружјето на либанската држава“, рече тој.
