Зборувајќи два дена откако претседателот Емануел Макрон објави големи промени во нуклеарната доктрина на Франција, вклучително и можноста за привремено распоредување борбени авиони способни за носење нуклеарно оружје кај европските сојузници, Лепен во интервју за радио РТЛ изјави дека „не ја гледа поентата“ во таквиот потег.
Таа додаде дека ако сојузниците сакаат таква заштита, ќе мора да понудат нешто за возврат. „Ќе им кажам на нашите сојузници: Во ред, можете да го имате на вашата територија, но тогаш мора да постои нешто за возврат“, кажа таа, наведувајќи го како пример „купувањето француска воена опрема“.
„Распоредувањето на нашето нуклеарно оружје во земјите што купуваат американски авиони Ф-35… постои голема контрадикција“, нагласи таа.
Евентуалното распоредување борбени авиони е дел од планот на Макрон за зајакнување на нуклеарната соработка со партнерите. Тој најави и заеднички нуклеарни вежби со европските сојузници, но нагласи дека конечната одлука за употреба на нуклеарно оружје ќе продолжи да ја носи исклучиво францускиот претседател, кој самиот ќе ги дефинира таканаречените витални интереси на државата.
Со месеци, дел од десницата го обвинуваше Макрон дека размислува да се откаже од францускиот суверенитет над својот нуклеарен арсенал, откако во последните години отвори врата за стратегиска нуклеарна соработка со европските сојузници.
Партијата Национален собир моментално води во анкетите пред претседателските избори следната година. Лепен е официјален претседателски кандидат на нејзината партија, иако одлуката за жалбата во нејзиното судење за проневера на средства од Европската Унија би можела да доведе до нејзино предавање на кандидатурата на претседателот на партијата, Џордан Бардела.
Тие двајца објавија заедничка изјава по говорот на Макрон во понеделникот во кој го изнесоа ставот на нивната партија за нуклеарното оружје.
