„Процесот на преговори е во тек. Знам дека српското раководство се обрати до САД, бидејќи токму нивното барање беше исполнето од компанијата создадена врз основа на меѓувладин договор меѓу Русија и Србија, но тоа е специфична карактеристика на Американците“, истакна Лавров.
Тој додаде и дека, според него, САД, со своите еднострани санкции, притисоци и злоупотреба на доларот, „ја поткопуваат глобализацијата која ја градеа со децении и им ја препорачуваа на сите како главно богатство на човештвото“.
Тој потсети дека меѓувладиниот договор меѓу двете земји наведува дека национализацијата на НИС не може да се случи без меѓусебна согласност.
„Под кои услови може да се постигне договор за национализација или за некоја друга форма на решение за овој проблем? Можеби решението се состои во наоѓање начин за продолжување на соработката со НИС, без оглед на можностите кои ги имаат САД да ја казнат таа компанија. Не знам, со тоа се занимаваат министерот за енергетика и релевантните економски оператори, како и компаниите во вашите соседни земји кои соработуваа со НИС. Но, немам сомнение дека праведноста секогаш треба да биде критериум. Во спротивно поставуваме преседани за многу други земји и тоа на никого не му е потребно“, оцени Лавров.
Нафтената индустрија на Србија е под санкции од Соединетите Американски Држави од 9 октомври, кои бараат да нема руска сопственост во компанијата.
