На прашањето за изјавата на американскиот претседател Доналд Трамп дека повторно ќе се вклучи во дијалогот меѓу Белград и Приштина и ќе го охрабри процесот на нормализација, Курти кажа дека Србија го крши основниот договор постигнат меѓу двете страни, пренесува порталот Косово онлајн.
Тој побара од српските власти да го екстрадираат Милан Радоичиќ, кого го нарече „главниот криминалец кој го уби полицискиот наредник, херојот на Косово, Африм Буњаку“.
Курти, исто така, го повика Белград да го потпише таканаречениот Основен договор заедно со Анексот за имплементација и да ја повлече изјавата на поранешната српска премиерка Ана Брнабиќ од декември 2023 година, со која се негира територијалниот интегритет на Косово.
„Верувам дека нормализацијата е можна, но притисокот мора да биде насочен кон Белград“, смета Курти, кој ја истакна „незаменливата улога на Соединетите Американски Држави“ во процесот.
Тој ги опиша САД како клучен сојузник и посебен пријател во три клучни области: безбедноста, дипломатијата и развојот.
