Меѓу двете земји високата напнатост не стивнува.
Заменик-министерот за надворешни работи Карлос Фернандес де Косиo даде изјава за можен дијалог неколку дена откако претседателот на САД Доналд Трамп изјави дека неговата администрација започнува разговори со лидерите на Куба. Претходно тој се закани со санкции кон секоја земја што би почнала да ѝ продава нафта на оваа карипска островска држава.
„Не зборуваме прецизно за преговори, барем не сè уште“, рече Косиo. „Тоа е посебно прашање“. Потоа додаде: „Отворени сме за дијалог. Ако можеме да имаме дијалог, можеби тоа ќе доведе до преговори“.
Косиo изјави дека Куба е подготвена за „неформален дијалог“ со САД, „со цел да се обезбеди дека можеме да имаме сериозна коегзистенција со заемно почитување, и покрај разликите меѓу нашите две земји“.
Сепак, Косиo посочи дека за некои работи нема разговор — тоа се уставот на Куба, нејзината економија и системот на владеење, кој е социјалистички.
„Но има многу, многу други прашања за кои можеме да разговараме“, рече тој.
Куба се соочува со акутна економска криза, прекини на струја, прекин на снабдувањето со гориво од Венецуела и американските санкции, кои, според официјалните лица во Хавана, ја чинат земјата повеќе од 7,5 милијарди долари во периодот од март 2024 до февруари 2025 година.
Куба во голема мера зависи од нафтата од Венецуела, но снабдувањето беше прекинато откако САД на 3 јануари ја нападнаа таа јужноамериканска земја и го заробија нејзиниот претседател Николас Мадуро.
Запрашан колку долго Куба може да ја издржи сегашната состојба, Косиo рече дека не може да открие „никаков пат“ што островот го има на располагање за снабдување со нафта или за справување со, како што рече, „многу тешката ситуација“.
„Куба, секако, се подготвува со сета своја креативност, стоицизам и подготвеност за штедење. Што може Куба да направи? Само гледајте нè“, рече Косиo.
Рускиот министер за надворешни работи Сергеј Лавров минатиот вторник телефонски разговараше со својот кубански колега Бруно Родригес и вети дека ќе му ја даде на островот „неопходната политичка и материјална поддршка“, соопшти Кремљ.
Русија наведе дека разговорот се однесувал и на билатералната соработка, а била изразена и осуда на она што го нарече неприфатлив „економски и воен притисок врз Куба, вклучително и попречување на снабдувањето со енергија“.
„Таквите дејствија ќе доведат до сериозно влошување на економската и хуманитарната состојба во земјата“, се додава во соопштението.
Кога Трамп кон крајот на минатата недела потпиша указ за царини на стоката од Куба, тој ја нарече земјата „пропадната нација“ и рече дека таа „изгледа како нешто што едноставно нема да може да преживее“.
Во меѓувреме, Трамп изјави дека побарал од Мексико да престане да ѝ испорачува нафта на Куба.
Мексиканската претседателка Клаудија Шејнбаум вчера најави дека ќе испрати храна и друга хуманитарна помош за Куба, додавајќи дека нејзината влада се обидува „дипломатски да реши сè што е поврзано со испораката на нафта“ за островот.
Во последните денови, шефот на американската мисија во Куба, Мајк Хамер, патува низ островот, објавувајќи видеоснимки на социјалните мрежи од своите средби со Кубанци. Некои го прегрнале и го поканиле во својот дом, а еден човек рекол дека не можел да му понуди кафе на дипломатот бидејќи нема струја.
Не го пречекуваат сите амбасадорот со љубезност. Во видео објавено на други социјални мрежи, група гневни Кубанци неодамна се соочиле со Хамер во покраината Камагвеј.
„Долу блокадата!“, извикувале, како и „Убиец!“, „Марионета на Трамп!“.
Како одговор, Американското биро за прашања на западната хемисфера побара од Куба „да ги прекине репресивните дејствија на испраќање поединци да се мешаат во дипломатската работа“ на Хамер и на другите од Амбасадата.
„Нашите дипломати ќе продолжат да се среќаваат со кубанскиот народ и покрај неуспешната тактика на заплашување од страна на режимот“, напиша Бирото во неделата на платформата Икс.
Во кратко интервју, заменик-министерот за надворешни работи на Куба, Косиo, нагласи дека Куба не претставува закана за Соединетите Американски Држави.
„Куба е мирна земја“, рече тој.
„Сакаме да имаме односи со Соединетите Американски Држави на ист начин како што имаме со остатокот од светот, а Соединетите Американски Држави денес се исклучок од тоа“, изјави тој.
