Ова соопштение следеше неколку часа откако Куба во четвртокот објави дека нејзините војници убиле четири лица и раниле уште шест на глисер регистриран на Флорида, кој влегол во кубанските води и отворил оган врз војниците, при што ранил еден кубански офицер.
Кубанската влада соопшти дека повеќето од десеттемина на бродот „имаат позната историја на криминални и насилни активности“.
Американскиот државен секретар Марко Рубио претходно им изјави на новинарите дека е известен за случајот и дека САД собираат информации за да утврдат дали жртвите се американски државјани или привремени жители.
„Разни служби на американската влада се обидуваат да идентификуваат елементи од приказната што можеби сè уште не ни се доставени“, рече Рубио на островот Сент Китс, каде што присуствуваше на регионален самит со карипските лидери.
Кубанската влада идентификуваше двајца патници како Амијаил Санчез Гонзалес и Леордан Енрике Круз Гомез, кои кубанските власти ги бараат „врз основа на нивното учество во промовирање, планирање, организирање, финансирање, поддршка или извршување акции спроведени на територијата на Куба или во други земји во врска со терористички акти“.
Владата соопшти дека го уапсила Дуниел Ернандез Сантос, додавајќи дека тој „бил испратен од Соединетите Држави за да обезбеди прием на вооружената инфилтрација, која ги признала своите постапки“.
Кубанската влада соопшти дека добила детали за патниците од осомничени приведени по престрелката.
Идентификувани се седум од десеттемина патници, меѓу кои Конрадо Галиндо Сариол, Хосе Мануел Родригез Кастиљо, Кристијан Ернесто Акоста Гевара и Роберто Алварез Авила.
Во четвртокот заменик-министерот за надворешни работи на Куба, Карлос Фернандез де Косио, изјави дека кубанската влада погрешно го идентификувала Роберто Аскора Консуегра како еден од патниците и дека Аскора не бил на бродот.
Кубанската влада соопшти дека еден од четворицата загинати бил Мишел Ортега Казанова.
„Истражниот процес продолжува додека фактите целосно не се разјаснат“, се наведува во соопштението на кубанското министерство.
Мисаел Ортега Казанова, брат на Мишел Ортега Казанова, изјави дека жали за смртта на својот брат, но изрази жалење што тој се впуштил во „опсесивна и ѓаволска“ акција за слобода на Куба.
Тој посочи дека неговиот брат, возач на камион и американски државјанин, кој живеел повеќе од 20 години во САД, имал сопруга, мајка, две сестри — од кои една живее на Куба — и ќерка.
Додаде за својот брат и неговите истомисленици: „Станаа толку опседнати што не размислуваа за последиците, ниту за сопствените животи“.
Мисаел рече дека не препознава ниту едно од имињата што ги објавила кубанската влада.
Државниот секретар Рубио одби да шпекулира што се случило, велејќи дека тоа може да биде „широк спектар работи“ и дека САД нема да се потпрат исклучиво на она што досега го соопштиле кубанските власти.
„Доволно е да се каже дека е многу невообичаено да се види престрелка на отворено море како оваа. Тоа не се случува секој ден. Многу долго време не се случило нешто слично со Куба“, рече Рубио.
Тој изјави дека и Министерството за внатрешна безбедност на САД и Крајбрежната стража на САД истражуваат и нагласи дека сака да ги провери фактите.
Рече дека тоа не била операција на американската држава и дека „нема да шпекулира чиј е глисерот, што правеле, зошто биле таму и што се случило“.
Еден од лицата што ги идентификувала кубанската влада, Конрадо Галиндо Сариол, бил интервјуиран во јуни 2025 година за Марти Нотисијас, новинарски портал со седиште во САД што долго време повикува на промена на власта на Куба.
Галиндо, кого водителот го нарече „легенда“ и поранешен политички затвореник, рече дека сака да ги поддржи Кубанците да се ослободат и додаде дека протестите на Куба во тоа време „не се искра што ќе биде изгасена“.
„Водачите на режимот одат од крај до крај на Куба обидувајќи се да го ублажат она што наскоро доаѓа, затоа што… знаат дека повеќе немаат власт, дека не можат ништо да направат во врска со тоа и бараат начини да го спречат ширењето на протестите во другите делови на земјата“, рече Галиндо.
Државниот секретар Рубио изјави дека дознал за престрелката пред кубанската влада да објави на социјалните мрежи, напоменувајќи дека САД имаат „постојан контакт“ со таа земја „на ниво на Крајбрежната стража“.
Претходно кубанското Министерство за внатрешни работи издаде соопштение со малку детали за престрелката, но наведе дека глисерот бил 1,6 километри североисточно од Кајо Фалконес, кај северниот брег на Куба.
Владата го објави регистарскиот број на чамецот, но Асошиејтед прес не можел лесно да го провери бидејќи регистрациите на чамци не се јавни во државата Флорида.
Канцеларијата на американскиот обвинител за Јужниот округ на Флорида соопшти дека ќе бара одговори „преку сите достапни правни и дипломатски канали“ и дека „фактите се нејасни и контрадикторни“.
Потпретседателот на САД Џеј Ди Венс изјави дека Рубио го известил за случајот и дека Белата куќа ја следи ситуацијата.
„Се надевам дека не е толку лошо како што се плашиме дека би можело да биде“, рече Венс.
Престрелката се заканува да ги зголеми тензиите меѓу САД и Куба. По соборувањето на претседателот на Венецуела Николас Мадуро, претседателот Доналд Трамп и високите претставници на администрацијата имаат сè поагресивен став кон Куба, која економски главно ја одржуваше венецуелската нафта, но неа повеќе ја нема.
Енергетската криза со која Куба се бори последниве години достигна нови екстреми минатиот месец кога Трамп потпиша извршна наредба со која би се вовела царина за секоја земја што продава или испорачува нафта на Куба. Овој потег изврши притисок врз Мексико, од кој Куба стана во голема мера зависна за нафта откако Трамп ги запре испораките од Венецуела.
