„Претседателот Путин останува отворен за каков било контакт со претседателот Трамп“, изјави за новинарите портпаролот на Кремљ, Дмитриј Песков, додавајќи дека засега не се планирани разговори меѓу двајцата лидери.
Во интервју за американската телевизиска мрежа Ен-би-си во неделата, Трамп изјави дека е „многу изнервиран“ и дека е „гневен“ на Путин поради прашањата околу Украина и се закани дека ќе воведе нови царини за руската нафта.
„Ако Русија и јас не можеме да постигнеме договор за прекин на крвопролевањето во Украина, а верувам дека тоа е виновна Русија, ќе воведам секундарни царини за целата нафта што излегува од Русија“, рече Трамп.
Таа промена на тонот е во контраст со динамиката на зближување што ја иницираа двајцата претседатели.
Во последниве недели, Москва и Вашингтон се договорија за целосна ревизија на нивните билатерални односи, кои беа сериозно оштетени од долгогодишните тензии, особено по 2022 година кога започна руската инвазија на Украина.
Путин неодамна го отфрли предлогот на Трамп за безусловен прекин на огнот во Украина, кој Киев го прифати под притисок на САД.
„Продолжуваме да работиме, пред се, на воспоставување билатерални односи, а работиме и на имплементација на одредени идеи поврзани со украинското решение“, рече Песков.
Според него, работата е во тек и засега нема конкретни детали.
„Тоа е долгорочен процес, веројатно поради сложеноста на случајот“, изјави Песков.
