Реорганизацијата на УСАИД ќе биде завршена до 1 јули, објави Стејт департментот, со што ја одреди судбината на агенцијата која се бореше против сиромаштијата и гладот низ светот.
Американскиот државен секретар Марко Рубио истакна дека правилната помош за странство може да ги унапреди националните интереси на САД, да ги заштити границите и да ги зајакне партнерствата со клучните сојузници, но дека УСАИД „за жал одамна се оддалечи од својата изворна мисија“, објавено е на сајтот на Стејт департментот.
„Како резултат на тоа добивките беа премали, а трошоците превисоки. Благодарение на претседателот (на САД Доналд) Трамп, тој погрешен и фискално неодговорен период сега е готов“, истакна Рубио.
Тој најави дека програмите за помош на странските држави ќе бидат пренасочени за директно да се усогласат со она што е најдобро за САД и нивните граѓани.
Администрацијата на Трамп ја обвини УСАИД за лошо управување со парите на даночните обврзници и финансирање странски програми кои не се во интерес на САД.
Сегашни и поранешни вработени на УСАИД, пак, тврдат дека агенцијата ја негувала „американската мека моќ“.
