Во остра осуда, американскиот Стејт департмент вчера ја отфрли конференцијата, организирана од Саудиска Арабија и Франција, како „трик за одвлекување на вниманието“ што ги поткопува тековните дипломатски напори за ставање крај на израелско-палестинскиот конфликт. „Овој напор е шлаканица на жртвите од 7 октомври“, се вели во соопштението. САД, како и Израел, одбија да испратат претставник и изјавија дека нема да „учествуваат во оваа навреда“.
Дводневната конференција доаѓа само неколку дена откако Франција ја објави својата одлука формално да ја признае Палестина како држава, што ја прави првата од водечките демократии на Групата седум (Г7) што го сторила тоа. Целта на конференцијата е повторно да се поттикне меѓународната поддршка за исход со две држави, во кој независна палестинска држава би коегзистирала мирно со Израел.
Иако САД не го доведоа директно во прашање решението со две држави во својата изјава, тие остануваат цврсто посветени на Израел, дури и додека критиките за хуманитарната криза во Газа растат. Генералниот секретар на ОН Антонио Гутереш во мрачниот воведен говор рече дека конфликтот меѓу Израел и Палестинците може да се реши со политичка волја и храбро лидерство, но сегашната ситуација не нуди таква надеж.
„Се наоѓаме на пресвртница. Решението за две држави е подалеку од кога било“, рече тој на конференцијата. „Тивката анексија на окупираниот Западен Брег е нелегална. Мора да престане“, рече Гутереш во остри забелешки насочени кон Израел.
„Масовното уништување на Газа е неподносливо. Мора да престане. Едностраните дејствија што засекогаш би го поткопале решението за две држави се неприфатливи. Мора да престанат.“
Палестинскиот премиер Мохамед Мустафа се обрати пред толпата и ја повтори подготвеноста на Палестинската самоуправа со седиште на Западниот Брег за преговори. Тој нагласи дека милитантната група Хамас мора да го положи оружјето во Газа и предупреди дека продолжувањето на воените операции не е патот кон мирот.
„Палестинците и Израелците не се осудени на вечна војна“, рече Мустафа. „Идејата дека мирот и безбедноста можат да се постигнат со уништување или потчинување на нашиот народ е илузија што сее смрт.“
Повеќето говорници вчера изразија силни критики за воените операции на Израел во Газа и активностите за населување на Западниот Брег, обвинувајќи ги дека ја поткопуваат перспективата за решение со две држави. „Ако сите се согласиме дека решението со две држави е патот напред, сите знаеме што или која е страната што нè спречува да продолжиме напред“, рече јорданскиот министер за надворешни работи, Ајман Сафади.
„Време е светот да преземе мерки против таа страна, а тоа е Израел.“ Неколку држави, исто така, го поздравија планираното француско признавање на Палестина како чекор кон дипломатска рамнотежа.
