„Нападите врз виталната цивилна инфраструктура на Блискиот Исток, како и нивното сè поголемо географско ширење, дополнително ги зголемуваат ризиците за населението во целиот регион и пошироко“, кажа Турк, потсетувајќи дека според законите на војната, цивилите и цивилната инфраструктура мора да бидат заштитени по секоја цена.
Сите страни се должни да ги почитуваат овие правила и мора да одговараат за секое прекршување.
„Целиот свет ве гледа“, додаде Турк.
„Предвидливите влијанија на тие напади врз цивилите и животната средина отвораат сериозни прашања за нивното почитување на принципите на пропорционалност и претпазливост според меѓународното хуманитарно право“, кажа високиот комесар на ОН, додавајќи дека тоа бара темелна правна ревизија.
Според него, последиците од војната и кризата веќе се чувствуваат во регионот и пошироко, особено за населението и неговата егзистенција.
Турк ја спомна и тешката состојба на странските работници во земјите од Заливот, од кои неколку веќе се убиени или повредени, додека на други им е спречено да се вратат дома.
Високиот комесар на ОН ги спомна и последиците од колапсот на комерцијалниот поморски сообраќај во Ормускиот теснец врз пристапот до енергенсите, храната и ѓубривата за населението во регионот и пошироко.
