„Потегот на САД сериозно го поткопува консензусот постигнат на билатералните разговори во Женева“, се вели во соопштението од кинеското Министерство за трговија, кое вети дека ќе возврати со решителни мерки доколку САД продолжат „значително“ да им штетат на кинеските интереси.
Министерството за трговија на САД минатата недела издаде упатства со кои ги предупредува компаниите дека користењето кинески чипови може да ги прекрши извозните контроли на САД.
„САД ги злоупотребуваат мерките за контрола на извозот и наметнуваат построги ограничувања на кинеските чипови врз основа на неоправдани обвинувања… Кина цврсто се спротивставува на ова“, соопшти кинеското министерство.
„Обидот да ги сопнеш другите не значи дека ти ќе трчаш побрзо“, додаде министерството, предупредувајќи дека потегот на Вашингтон на крај би можел да ѝ наштети на американската индустриска конкурентност.
Коментарите дојдоа откако Кина и САД постигнаа неочекувано 90-дневно царинско примирје во трговските преговори во Женева претходно овој месец, при што двете страни се согласија драстично да ги намалат троцифрените царини што претходно ги воведоа една на друга, додека се обидуваат да постигнат долгорочен договор.
Кинескиот заменик-министер за трговија Ли Ченгганг и американскиот трговски претставник Џејмисон Грир, кои учествуваа во преговорите во Женева, се состанаа минатата недела на маргините на состанокот на Азиско-пацифичкиот форум за економска соработка во Јужна Кореја. Ниту едната страна не објави соопштение со детали од разговорот.
