Портпаролот на кинеското министерство за трговија денес за прв пат ја коментираше заканата на Трамп. „Прибегнувањето кон закани за високи тарифи не е правилен начин за соработка со Кина. Нашата позиција за царинската војна останува конзистентна – не ја сакаме, но не се плашиме од неа“, порача тој.
Тој додаде дека ако САД продолжат со своите еднострани потези, Кина „решително ќе преземе соодветни мерки за да ги заштити своите легитимни права и интереси“. Пекинг ги повика САД „итно да го поправат својот погрешен пристап“ и да го зачуваат тешко постигнатиот напредок во разговорите меѓу кинескиот лидер Си Џинпинг и Трамп.
Портпаролот на министерството за трговија ги опиша контролите на извозот на Кина како „легитимен потег“, обвинувајќи го Вашингтон за примена на двојни стандарди. „Долго време, САД го растегнуваа концептот на националната безбедност и ги злоупотребуваа контролите на извозот, усвојувајќи дискриминаторски мерки против Кина“, кажа тој. Тој посочи дека Вашингтон вовел еднострани ограничувања за широк спектар на производи, вклучувајќи полупроводничка опрема и чипови. „Листата на САД за контрола на извозот опфаќа повеќе од 3.000 артикли – во споредба со нешто повеќе од 900 на листата на Кина“, додаде портпаролот.
Министерството го обвини Вашингтон за најновата ескалација на трговските тензии, велејќи дека администрацијата на Трамп вовела серија нови рестриктивни мерки против Кина само 20 дена по последната рунда разговори во Мадрид на почетокот на септември. Овие мерки вклучуваат додавање на нови кинески субјекти на листата за контрола на извозот, проширување на контролите на подружниците на котираните компании и воведување посебни пристанишни такси за кинеските бродови.
Новите извозни ограничувања на Кина за ретки земни метали значително ќе го зголемат притисокот врз глобалната индустрија и синџирите на снабдување со технологија. Овие минерали се клучни за производство на широк спектар на производи, од секојдневна електроника, полупроводници и автомобили до борбени авиони. Кина е главен светски производител на овие клучни суровини, што ѝ дава значителна предност во преговорите со САД.
Неколку часа по заострувањето на контролата врз извозот на ретки минерали Пекинг објави дека ќе почне да наплаќа такси за американските бродови кои влегуваат во кинеските пристаништа од 14 октомври. Со тоа, тој возврати на новата американска царина за кинеските бродови која стапува на сила истиот ден. Според Центарот за стратегиски и меѓународни студии, САД учествуваат само со 0,1% во глобалната бродоградба, во споредба со 53,3% на Кина.
Кинеското министерство за трговија ја брани својата одлука како „неопходни пасивни одбранбени акции“, додавајќи дека потезите на САД „сериозно ја оштетиле атмосферата на економските и трговските преговори меѓу двете страни“.
Високи американски и кинески претставници се сретнаа на трговски разговори во Женева во мај, првата средба откако Трамп започна глобална трговска војна. Средбата во Лондон во јуни резултираше со трговска „рамка“, додека третата рунда разговори еден месец подоцна донесе напредок. Најновите состаноци во Мадрид во септември доведоа до „основен рамковен консензус“ за продажба на кинеската социјална мрежа Тикток.
Трамп и Си разговараа по телефон на 19 септември, но не го финализираа договорот за Тикток. По повикот, Трамп објави дека ќе се сретне со Си на маргините на форумот за азиско-пацифичка економска соработка кон крајот на октомври во Јужна Кореја. Иако Кина не коментираше за идните средби, Трамп исто така најави посета на Кина на почетокот на следната година и пристигнување на Си во САД. Сепак, во петокот се закани дека ќе ја откаже претстојната средба со Си по најновите ограничувања на Кина.
