Кина обезбедила испораки на соја до крајот на ноември со зголемени купувања во Аргентина во последните недели и сега треба да купи уште осум до девет милиони тони за декември и јануари, велат изворите.
Набавката во САД е запрена поради трговските тензии меѓу САД и Кина.
„Кина не купува американска соја поради трговската војна, а бразилската соја е премногу скапа“, објаснува еден трговец со маслодајни семиња од меѓународна трговска компанија која испорачува земјоделски производи во Кина.
Пекинг би можел да го покрие периодот до новата жетва во Јужна Америка, на крајот од оваа година и почетокот на следната година, од државните залихи, се проценува.
Цените на бразилската соја во моментов се за 2,8 до 2,9 долари за бушел (околу 27,2 килограми) повисоки од фјучерсите на сојата за ноемвриска испорака со кои се тргува на Чикашката стоковна берза.
Од друга страна, американската соја е поскапа за околу 1,7 долари за бушел.
Денес цената на еден бушел соја во идни договори изнесуваше околу 10 долари.
Кинеските купувачи се надеваат дека цените ќе се стабилизираат со рана жетва во Бразил на почетокот на 2026 година, која треба да биде исклучително изобилна.
Бразилските земјоделци треба да соберат 177,64 милиони тони соја во земјоделската сезона 2025/2026, околу шест милиони тони повеќе отколку во 2024/2025 година, според прогнозите на бразилската агенција за земјоделски култури Конаб.
„Сметаме дека пратките соја од новата жетва во Бразил би можеле да почнат кон крајот на јануари“, вели друг трговец. Изворите зборувале за Ројтерс под услов да останат анонимни, бидејќи не се овластени да разговараат со медиуми.
Кинеските купувачи сè уште не ја отпишале целосно американската соја, а доколку Пекинг и Вашингтон постигнат трговски договор, преработувачите на маслодајни семки веројатно ќе набавуваат соја за периодот од декември до јануари од американски добавувачи, забележуваат трговците и аналитичарите.
„Доколку се постигне договор, кинеските купувачи веројатно ќе се свртат кон американската соја во наредните два месеци, бидејќи цените се попривлечни од оние што ги нудат јужноамериканските добавувачи“, проценува Џони Ксијанг, основач на Аградар консалтинг со седиште во Пекинг.
Сојата треба да биде меѓу главните теми на најавената средба меѓу американскиот претседател Доналд Трамп и кинескиот претседател Си Џинпинг во Јужна Кореја.
Од првиот мандат на Трамп Кина купува соја од неколку земји, а минатата година, според податоците од кинеската царинска администрација, пратките од Соединетите Американски Држави сочинуваа само околу 20 отсто од вкупниот кинески увоз на маслодајни семки. Во 2016 година изнесуваше 41 отсто.
Кина е најголемиот увозник на соја во светот, со удел во вкупниот увоз од околу 60 проценти. Во септември, тие увезле 12,9 милиони тони маслодајни семиња, главно од добавувачи од Јужна Америка.
