Ким ги даде коментарите на церемонија во Пјонгјанг, каде што се сретна со командантите на единицата која се бореше во западниот руски регион Курск, објави севернокорејскиот државен медиум КЦНА. Тој ги пофали како „херојска војска“, а на фотографиите се гледа како им закачува медали на униформите. На фотографиите објавени од КЦНА, исто така, се гледа како Ким става значки на врамените фотографии од загинатите војници, чии имиња беа напишани со златна боја под сликите.
„Срцето ме боли и огорчен сум додека се соочувам со реалноста дека прекрасните личности кои ги дадоа своите скапоцени животи за голема победа и слава можат да се сретнат само преку фотографии на спомен-ѕидот“, рече Ким во својот говор. „Додека стојам пред семејствата на паднатите војници, не знам како да го изразам мојот жал и извинување што не успеав да ги заштитам нашите драгоцени синови.“
На сликите објавени од севернокорејските државни медиуми се гледа како лидерот Ким Џонг Ун клечи пред портретите на загинатите војници во војната на Русија против Украина и како бакнува преживеан од тие конфликти.
North Korea’s Kim kneels before portraits of soldiers killed fighting for Russia against Ukraine, decorates survivorshttps://t.co/dzxchzesDe pic.twitter.com/Geyiful8QV
— AFP News Agency (@AFP) August 22, 2025
Според објавените снимки, церемонијата била исклучително емотивна. Ким се сретнал со членовите на семејствата кои плачеле и им оддавале почит пред сликите на војниците. Неколку фотографии го покажаа Ким како прегрнува расплакани деца и војници. По церемонијата, властите одржаа банкет во чест на единицата што се вратила.
Северна Кореја почна да испраќа значителен број војници и опрема за поддршка на воените напори на Русија минатата година, по состаноците на високо ниво меѓу Ким и рускиот претседател Владимир Путин. Иако двете земји првично негираа какво било распоредување, подоцна јавно го признаа учеството на силите на Пјонгјанг.
Режимот на Ким долго време молчеше за извештаите за големите загуби во Курск, што ја прави церемонијата оваа недела ретко признание за разорното влијание на војната врз нејзините сили.
Украинските и американските разузнавачки агенции проценуваат дека има околу 12.000 севернокорејски војници во Русија, а првите пристигнаа есента 2024 година. Оттогаш, околу 4.000 се убиени или ранети. Иако на севернокорејските војници им недостасува скорешно борбено искуство, аналитичарите предупредуваат дека не треба да се потценуваат, бидејќи веројатно доаѓаат од елитни и високо индоктринирани единици.
Украинските специјални сили ги опишаа за Си-ен-ен бруталните и речиси самоубиствени тактики на Севернокорејците, вклучувајќи ги и случаите каде што војниците детонирале гранати за да избегнат заробување. И покрај големите загуби, соработката продолжува.
Новите разузнавачки информации во јули сугерираа дека Пјонгјанг има намера тројно да го зголеми присуството на своите војници во Русија, испраќајќи дополнителни 25.000 до 30.000 војници во наредните месеци. Ова предизвика стравувања за тоа што Москва би можела да понуди за возврат, како што се напредна вселенска, сателитска или нуклеарна технологија.
