Тврдењето доаѓа откако Киев веќе ја обвини Москва за измислување наводен украински напад со беспилотни летала врз резиденцијата на рускиот претседател Владимир Путин, исто така со цел нарушување на мировниот процес. Сега украинските разузнавачи веруваат дека Русија има намера дополнително да ја ескалира ситуацијата со исцениран напад со голем број жртви, во пресрет на православниот Божиќ на 7 јануари.
Тие ги темелат своите тврдења на следење на подготовките на Кремљ за интензивна кампања за дезинформации, без да понудат какви било докази.
„Со голема веројатност, предвидуваме премин од манипулативно влијание кон вооружена провокација на специјалните служби (на Руската Федерација), што ќе резултира со значителни човечки жртви“, се наведува во соопштението на разузнавачката служба.
„Местото на провокација може да биде религиозен објект или друг објект од големо симболично значење и во (Русија) и на привремено окупираните територии на Украина“, се додава.
Според украинските разузнавачки служби, Кремљ планира да ја обвини Украина за нападот со распоредување беспилотни летала од западно производство, испорачани од фронтовските линии, на местото на инсценираниот настан.
Украинската тајна служба истакнува дека ваквите операции „се во согласност со начинот на работа на руските специјални служби“.
„Режимот на Путин постојано ја користел оваа тактика во (Руската Федерација), а сега истиот модел се извезува во странство, што индиректно е потврдено со јавни изјави на високи руски функционери“, се тврди во соопштението.
Како наводен пример за оваа тактика се наведуваат бомбашките напади врз станбени згради во 1999 година во руските градови Москва, Бујнакск и Волгодонск. Повеќе од 300 луѓе беа убиени, а над 1.000 луѓе беа повредени во тие напади. Официјално тие им се припишуваат на чеченски милитанти, но Западот ги смета за изговор за почнување нова војна во Чеченија зголемувајќи ја популарноста на Путин пред изборите.
