Зборувајќи заедно со својот колега од Гана, Сибиха кажа дека се во тек разговори со владите низ цела Африка за да се спречи нивните граѓани да бидат вовлечени во такви шеми. Следната година Гана ќе претседава со регионалниот блок на Африканската унија.
„Јасно гледаме дека Русија се обидува да ги вовлече африканските граѓани во смртоносната војна“, наведе Сибиха на прес-конференција. „Според нашите податоци, во моментов има повеќе од 1.780 граѓани од африканскиот континент во руската армија“, тврди тој, според Ројтерс.
Тој додаде дека овие борци доаѓаат од 36 различни земји низ целиот африкански континент.
Руските власти негираат дека нелегално регрутираат африкански државјани за борба во вооружените сили.
Сепак, во последните месеци има почести извештаи за африкански мажи кои биле намамени во Русија со ветувања за работа, а потоа се нашле на фронтовската линија во Украина, што наводно предизвикало тензии меѓу Москва и некои од вклучените земји.
Министерот за надворешни работи на Гана, Самуел Окуџето Аблаква, кажа дека многу Африканци кои се борат за Русија биле жртви на измама, намамени на „мрачниот интернет“ со ветувања за обични работни места.
„Тие немаат безбедносно искуство. Немаат воено искуство. Не се обучени“, кажа Аблаква. „Тие само биле намамени и измамени, а потоа испратени на фронтовските линии“.
Аблаква изрази солидарност со Украина и повика на прекин на огнот за да се оконча војната, која во вторникот ја одбележа својата четврта годишнина. Тој кажа дека ќе го замоли украинскиот претседател Володимир Зеленски да ослободи двајца воени заробеници од Гана, кои биле заробени додека се бореле за Русија.
За време на претседателствувањето со Африканската унија Гана ќе промовира програми за подигање на јавната свест за мрежите за трговија со луѓе кои лажно регрутираат за руските сили, кажа Аблаква.
