„Мислам дека на крајот од неделата, оваа недела“, им одговори претставник на кабинетот на украинскиот претседател на новинарите на прашањето кога ќе се одржи новата рунда преговори. „Не е тајна дека преговорите не се лесни, но дефинитивно има напредок и се приближуваме кон моментот кога сите страни ќе мора да донесат конечни одлуки, дали ќе ја продолжат оваа војна или ќе преминат на мир“, се наведува во соопштението од кабинетот на украинскиот претседател.
Се наведува и дека следната размена на воени заробеници меѓу Русија и Украина би можела да се случи оваа недела и дека би можела да биде поголема од претходната, кога земјите разменија по 157 воени заробеници. Но не е прецизиран точниот број.
На прашањето на новинарите за однесувањето на Русија во преговорите, од кабинетот одговорија дека тоа било „воздржано, учтиво и професионално“. „Се однесуваат на дипломатски коректен начин, исто така, на сите им е јасно дека имаме различни ставови“, се наведува.
Се истакнува и дека Украина „прави сè“ за да организира средба меѓу претседателите на Украина и Русија, Володимир Зеленски и Владимир Путин, но дека тоа е малку веројатно во моментов.
