„Русија повторно го прави истото, користејќи опасни изјави за да ги поткопа сите достигнувања од нашите заеднички дипломатски напори со тимот на претседателот Трамп. Ние продолжуваме да работиме заедно за да го приближиме мирот.
Оваа наводна приказна за ‘напад врз резиденцијата’ е целосна измислица, наменета да ги оправда дополнителните напади врз Украина, вклучително и врз Киев, како и одбивањето на самата Русија да ги преземе неопходните чекори за завршување на војната. Типични руски лаги. Покрај тоа, Русите веќе го имаат гаѓано Киев, меѓу другото и зградата на Кабинетот на министри.
Украина не презема чекори што можат да ја поткопаат дипломатијата. Напротив, Русија секогаш презема такви чекори. Тоа е една од многуте разлики меѓу нас.
Клучно е светот сега да не молчи. Не смееме да ѝ дозволиме на Русија да ја поткопа работата за постигнување траен мир“, напиша Зеленски на Икс
Russia is at it again, using dangerous statements to undermine all achievements of our shared diplomatic efforts with President Trump’s team. We keep working together to bring peace closer.
This alleged “residence strike” story is a complete fabrication intended to justify…
— Volodymyr Zelenskyy / Володимир Зеленський (@ZelenskyyUa) December 29, 2025
Зеленски рече дека Русија сака да ја заврши војната исклучиво преку притисок, а актуелните обвинувања ги гледа како дел од поширока стратегија. „Тие можат да ја завршат само со притисок врз самите себе. Сигурен сум дека барале повод за ова. Искрено, уште вчера очекував ваква реторика. Гледате, тие одат и понатаму“, рече тој.
Украинскиот претседател предупреди дека изјавите на Москва за наводен напад врз резиденции всушност служат како подготовка за нови напади. „Сега, со тврдењето дека некои нивни резиденции биле нападнати, тие едноставно подготвуваат, сигурен сум, во принцип подготвуваат терен за напади, веројатно врз главниот град и веројатно врз зградите на државните институции“, рече Зеленски.
Зеленски потсети дека Украина веќе има искуство со такво сценарио. „Ова веќе го имавме во септември, кога беше изведен ракетен напад врз зградата на Владата на Украина. Затоа сега сите мора да бидат на штрек, апсолутно сите“, рече тој.
Тој додаде дека постои реална можност за напад врз Киев. „Нападот би можел да биде насочен кон главниот град. Особено затоа што таа личност, ако воопшто може така да се нарече, рече дека ќе избира соодветни цели, што претставува закана“, изјави Зеленски.
Украинскиот претседател порача дека очекува посилно вклучување на американскиот претседател Доналд Трамп, неговата администрација и европските сојузници. „Мислам дека денес, во принцип, претседателот Трамп, неговиот тим и Европејците треба да се вклучат и да ја завршат неопходната работа со луѓето што уште вчера тврдеа дека навистина сакаат да ја завршат војната“, рече тој.
И украинскиот министер за надворешни работи Андриј Сибиха порача дека руските тврдења за наводен „обид за напад врз резиденцијата на Путин“ се измислени и служат исклучиво како изговор за нови напади врз Украина и за поткопување на мировниот процес.
„Руските манипулации околу наводниот ‘обид за напад врз резиденцијата на Путин’ се измислени од само една причина: да се создаде повод и лажно оправдување за понатамошни руски напади врз Украина, како и за поткопување и саботирање на мировниот процес“, напиша Сибиха на социјалната мрежа Икс.
Russian manipulations regarding the alleged “attempt to attack Putin’s residence” are fabricated for only one reason: to create a pretext and false justification for Russia’s further attacks against Ukraine, as well as to undermine and impede the peace process.
Usual Russian…
— Andrii Sybiha 🇺🇦 (@andrii_sybiha) December 29, 2025
Тој додаде дека станува збор за вообичаена руска тактика. „Типична руска тактика: да се обвини другата страна за она што самите го прават или планираат да го направат“, порача Сибиха и додаде:
„Прво, самата Русија годинава ја нападна зградата на украинската влада. Второ, Украина на територијата на Русија гаѓа исклучиво легитимни воени цели, како одговор на руските напади врз Украина. Трето, Русија е агресор, а Украина е земја што е нападната и која се брани во согласност со членот 51 од Повелбата на Обединетите нации. Не може да има лажна еднаквост меѓу агресорот и земјата што се брани“.
На крај, тој ја повика меѓународната заедница да реагира. „Го повикуваме светот да ги осуди провокативните руски изјави насочени кон опструкција на конструктивниот мировен процес. Украина останува посветена на мировните напори предводени од Соединетите Држави, со учество на европските партнери“, порача Андриј Сибиха.
Рускиот министер за надворешни работи Сергеј Лавров денеска соопшти дека руската противвоздушна одбрана уништила 91 далекометен дрон што се движеле кон резиденцијата Долгие Бороди во Новгородската област, сместена меѓу Москва и Санкт Петербург.
Лавров не даде никакви докази за своето тврдење, но рече дека Русија веќе избрала цели за одмазднички напади.
Советските и руските лидери ја користеле Долгие Бороди како одморалиште, но тоа не е главната резиденција на Путин, а не се знае дали тој престојувал таму последниве денови.
