„Сега сме во клучен момент. Сè уште не сме таму. Она во што успеавме е само пауза“, Кажа Ал Тани, мислејќи се на прекинот на огнот во Газа кој стапи на сила пред речиси еден месец. „Сè уште не можеме да го сметаме за примирје. Примирјето не може да се консолидира без целосно повлекување на израелските сили, сè додека не се врати стабилноста во Газа и луѓето не можат да влегуваат и да го напуштат Појасот, што не е случај денес“, додаде тој.
Дискусиите за спроведување на следните фази од планот на американскиот претседател Доналд Трамп за прекин на двегодишниот конфликт во палестинската енклава се во тек. Планот предвидува преодна технократска палестинска влада во Газа која ќе биде надгледувана од меѓународен „мировен комитет“ и поддржана од меѓународни безбедносни сили.
Финализирањето на договорот за составот и мандатот на меѓународните сили се покажа како особено предизвикувачко, пишува Ројтерс. Завчера, израелската делегација одржа разговори со медијатори во Каиро за враќање на последното тело на заложник од Газа, со што би се заокружила клучната прва фаза од планот на Трамп.
Од почетокот на кревкото примирје, Хамас ги ослободи сите 20 живи заложници и предаде 27 тела во замена за околу две илјади палестински притвореници. По постигнувањето на прекинот на огнот на 10 октомври, борбите значително се намалија, но Израел продолжува да ја бомбардира Газа и да ја уништува она што го нарекува инфраструктура на Хамас, при што убива голем број цивили.
