Карни рече дека таков потег ќе зависи од демократските реформи, вклучително и одржувањето избори на Палестинската самоуправа следната година без Хамас.
Неговите изјави доаѓаат еден ден откако Велика Британија објави дека ќе ја признае палестинската држава во септември доколку Израел не се согласи на прекин на огнот и други услови, и една недела откако Франција даде слична најава.
Повеќето земји – околу 139 вкупно – формално ја признаваат палестинската држава, пренесува Би-би-си.
Премиерот ги наведе проширувањето на израелските населби на окупираниот Западен Брег, влошувањето на хуманитарната ситуација во Газа и нападите на Хамас врз Израел на 7 октомври 2023 година, како причини за драматичната промена во канадската надворешна политика.
На прес-конференција, Карни изјави: „Нивото на човечко страдање во Газа е неподносливо и брзо се влошува“.
Тој рече дека признавањето на палестинската државност ќе зависи од посветеноста на Палестинската самоуправа фундаментално да ја реформира својата администрација, да одржи општи избори во 2026 година без Хамас и да ја демилитаризира територијата.
Тој додаде дека Канада долго време е посветена на решение со две држави како дел од преговорите за мировен процес, но рече дека „овој пристап повеќе не е одржлив“.
„Перспективите за палестинска држава се намалуваат пред нашите очи“, рече тој.
