Израелската армија објави дека убиениот Хасан Фархат стои зад ракетниот напад во градот Сафед минатата година во кој загинаа и беа повредени неколку израелски војници.
Израел се закани дека ќе дејствува против борците на Хамас каде и да се. Безбедносен извор изјави за Ројтерс дека Фархат бил убиен заедно со неговиот син и ќерка во јужниот либански град. Вооруженото крило на Хамас, бригадите Ал-Касам, објавија дека Фархат бил убиен во неговиот стан и го пофали неговиот придонес во конфликтот против Израел.
Сè позагрозено примирјето
Хамас и Хезболах се сојузници, а либанското движење започна со прекугранични напади врз Израел во 2023 година во знак на солидарност со палестинската група. Израел одговори со голема воздушна и копнена операција во која минатата година загина поголем дел од раководството на Хезболах.
Кабинетот на либанскиот премиер Наваф Салам денеска соопшти дека израелскиот напад е јасно кршење на примирјето меѓу Израел и Хезболах. Се чини дека тоа е сè позагрозено во последните неколку недели поради израелските напади врз јужните предградија на Бејрут и двете ракети лансирани од Либан кон Израел.
