Примирјето во Газа стапи во сила, објавија денеска Израелските одбранбени сили (ИДФ).
Според соопштението објавено на социјалните медиуми, израелските трупи го завршиле повлекувањето кон позициите договорени според договорот за примирје на американскиот претседател Доналд Трамп од 12 часот по локално време (9:00 часот по Гринич).
„Трупите на ИДФ почнаа да се позиционираат по ажурираните линии за распоредување како подготовка за договорот за примирје и враќањето на заложниците“, изјави војската. Додаде дека израелските трупи во Јужната команда сè уште се распоредени во областа и „ќе продолжат да ја отстрануваат секоја непосредна закана“.
Израелската влада претходно ја одобри „првата фаза“ од договорот за примирје, која им дава на ИДФ 24 часа да ги повлече своите сили. Потоа, Хамас треба да ги ослободи сите живи заложници во рок од 72 часа. За возврат, Израел ќе ослободи 250 Палестинци што издржуваат доживотна казна затвор и 1.700 жители на Газа што се притворени од 2023 година, вклучувајќи ги сите жени и малолетници.
Четириесет и осум израелски заложници остануваат во Газа, а се верува дека само околу 20 се живи.
