„Тоа би бил концентрационен логор. Жал ми е“, изјави Олмерт. Министерот Кац претходно потврди дека откако ќе влезат внатре, на Палестинците нема да им биде дозволено да заминат, освен во други земји. Тој ѝ наредил на војската да започне со изготвување оперативни планови за изградба на „хуманитарен град“ на урнатините на јужниот дел на Газа, во кој првично би биле сместени 600.000 луѓе, а на крајот и целото палестинско население.
„Доколку тие (Палестинците) бидат депортирани во нов „хуманитарен град“, тогаш може да се каже дека тоа е дел од етничко чистење. Тоа би било неизбежното толкување на секој обид за создавање камп за стотици илјади луѓе“, предупреди Олмерт.
Тој не смета дека сегашната израелска кампања претставува етничко чистење бидејќи „евакуацијата на цивилите за да се заштитат од борбите е легална според меѓународното право, а Палестинците се враќаат во областите каде што воените операции се завршени“.
Проектот „хуманитарен град“ е поддржан од израелскиот премиер Бенјамин Нетанјаху, а одбивањето на Израел да се повлече од областа што Кац ја предвидува за кампот е камен на сопнување во застојот во преговорите за договор за прекин на огнот, пренесуваат израелските медиуми.
„Кога ќе изградат камп каде што планираат да „исчистат“ повеќе од половина од Газа, неизбежно е разбирањето дека Палестинците не се спасени, туку депортирани, протерани и отфрлени. Барем јас немам друго разбирање“, истакна Олмерт.
Израелската влада тврди дека планот е дизајниран да ги заштити Палестинците. Израелците кои го опишаа планираниот „хуманитарен град“ како концентрационен логор беа критикувани поради споредби со нацистичка Германија. Јад Вашем, израелскиот меморијален центар на Холокаустот, обвини новинар за „сериозно и несоодветно искривување на значењето на холокаустот“.
