Извештајот неодамна беше објавен во рамките на системот „Интегрирана класификација на фази на безбедност на храната“ (ИПЦ).
Претставникот на израелското министерство, Еден Бар Тал, изјави дека доколку ОН не ги ревидира наодите, Израел планира да започне кампања меѓу земјите-донатори на ИПЦ, повикувајќи ги да го прекинат финансирањето на платформата, а воедно да обезбеди докази што наводно го оспоруваат извештајот и укажуваат на несигурноста на системот, пренесува Тајмс оф Израел.
Бар Тал ја обвини ИПЦ дека „свесно ги игнорира сопствените методолошки стандарди“ за да дојде до „предвиден заклучок за глад“ со цел да ја поддржи „лажната пропаганда на Хамас за изгладнување на населението“.
Според израелското министерство, ИПЦ манипулирала со податоците со селективно избирање и погрешно претставување на резултатите, се потпирала на шпекулативни претпоставки за смртноста без цврсти докази и ги игнорирала индикациите за подобрување на хуманитарната ситуација.
Во писмо до ОН, израелското министерство бара да се спроведе „итна и транспарентна ревизија“ на извештајот, со цел да се исправат методолошките грешки и да се спречи „заблудување на меѓународната заедница, јавноста и носителите на одлуки“.
Во извештајот на ИПЦ, објавен минатиот петок, се проценува дека околу 514.000 луѓе во Газа, речиси една четвртина од вкупното население, веќе ги исполнуваат критериумите за состојба на глад, додека се очекува тој број да се зголеми на 641.000 до крајот на септември.
