„Тие се закануваат дека ќе предизвикаат штета, ако е така, сигурно ќе има цврст одговор од Иран“, рече ајатолахот за време на говорот по повод крајот на муслиманскиот пост Рамазан.
Хамнеи директно не го спомна Трамп, кој во неделата се закани дека ќе го бомбардира Иран доколку пропаднат разговорите за нуклеарната програма.
„Ако тие (Иранците) не го потпишат договорот, ќе има бомбардирање“, изјави Трамп во интервју за американската телевизиска мрежа Ен-би-си.
САД и Иран немаат дипломатски односи од 1979 година. Двете земји имаат само индиректни размени преку швајцарската амбасада во Техеран, која ги застапува американските интереси во Иран.
На 7 март, американскиот претседател рече дека испратил писмо до иранските власти во кое предлага преговори да се спречи Техеран да развие нуклеарно оружје, заканувајќи се со воена интервенција.
Иранските власти тогаш одговорија со изјава дека се против директни преговори под „максимален притисок и закани“, но се отворени за индиректни контакти.
Во 2015 година, Иран склучи договор со Франција, Германија, Велика Британија, Кина, Русија и САД за својата нуклеарна програма во Виена. За возврат, текстот предвидуваше намалување на меѓународните санкции против Техеран.
Меѓутоа, во 2018 година, Трамп, тогашен американски претседател во неговиот прв мандат (2017-2021), еднострано ја повлече својата земја од договорот и повторно воведе тешки санкции за Иран. Како одговор, Техеран ги зголеми резервите на збогатен ураниум на 60 отсто, додека 90 отсто се потребни за производство на атомско оружје.
