„Вооружените сили на Исламската Република Иран се способни да водат најмалку шестмесечна интензивна војна со сегашното темпо на операциите“, изјави портпаролот на Револуционерната гарда Али Мохамад Наини, според агенцијата Фарс.
Иранската Револуционерна гарда, елитна воена сила на Иран, соопшти и дека погодила „повеќе од 200“ локации поврзани со американски и израелски бази и објекти низ регионот.
На 28 февруари САД и Израел почнаа напади врз Иран во кои беше убиен врховниот водач Али Хамнеи и беше предизвикана војна на Блискиот Исток.
Иран одговори со напади со дронови и ракети низ регионот, вклучително и напади врз соседни земји што тврдат дека ниту се вклучени во војната ниту дозволиле завојуваните страни да изведуваат напади од нивната територија.
Израелскиот премиер Бенјамин Нетанјаху најави продолжување на војната против Иран „со сета сила“, со план да се отстрани државното раководство.
Портпаролот на Револуционерната гарда рече дека иранските сили досега користеле ракети од „првата и втората генерација“, но во наредните денови планираат да употребат „понапредни и поретко користени ракети со долг дострел“.
Војната дополнително ескалираше со нападот со дрон врз американска база во Кувајт, при што загинаа шест американски војници. Во меѓувреме, иранскиот безбедносен функционер Али Лариџани ја обвини администрацијата на Доналд Трамп дека се обидува да го повтори сценариото од Венецуела — брз напад и преземање на власта.
„Мислеа дека ќе биде како во Венецуела — ќе удрат, ќе ја преземат контролата и ќе заврши. Но сега се во стапица“, изјави тој во интервју емитувано на иранската државна телевизија.
Во самиот Иран штетата врз инфраструктурата и станбените области расте, а жителите пријавуваат зголемена анксиозност и силно присуство на безбедносните сили. Нетанјаху изјави дека Израел речиси целосно го контролира воздушниот простор над Техеран.
Аналитичарите предупредуваат дека сè уште нема јасна стратегија за завршување на конфликтот, за кој американски и израелски функционери велат дека може да трае најмалку еден месец или подолго.
