Три европски сили му се закануваат на Техеран со повторно воведување санкции од Обединетите нации доколку не се врати на преговорите насочени кон ограничување на неговата контроверзна програма за збогатување ураниум.
Германскиот министер за надворешни работи Јохан Вадефул потврди дека разговорите ќе се одржат следната недела и го предупреди Иран дека санкциите ќе бидат повторно воведени доколку не успее да постигне одржлив, контролиран договор за решавање на загриженоста во врска со неговите нуклеарни амбиции. Тој повтори дека останува многу малку време и дека Иран мора да биде посветен на преговорите.
Иранските државни медиуми објавија дека Арагчи и неговите европски колеги се договориле за време на телефонскиот разговор замениците министри за надворешни работи да ги продолжат преговорите во вторник.
За време на разговорот, Арагчи нагласил дека овие земји немаат ниту законско, ниту морално право повторно да воведат санкции врз него и предупреди дека таков потег ќе има последици, пренесуваат иранските медиуми.
Европските сили и САД тврдат дека Иран би можел да развие нуклеарно оружје, што Иран го негира и тврди дека сака само цивилна нуклеарна енергија.
Меѓународната агенција за атомска енергија (МААЕ) утврди дека Иран не е блиску до развој на нуклеарна бомба, а директорот на американската разузнавачка заедница, Тулси Габард, во март сведочеше дека разузнавачките експерти не нашле докази дека Иран напредува кон нуклеарно оружје.
Иран ги прекина нуклеарните разговори со САД откако САД и Израел ги бомбардираа неговите нуклеарни постројки за време на 12-дневната војна.
Инспекторите на МААЕ оттогаш не беа во можност да пристапат до нуклеарните постројки на Иран.
Иран и трите европски сили последен пат се сретнаа во Женева на 20 јуни, додека војната сè уште траеше и немаше знаци за напредок.
Иранската државна телевизија соопшти дека иранска делегација треба да отпатува во Виена во петок на средба со претставници на МААЕ, без да даде други детали.
