Победникот на тендерот ќе го замени Лукоил како менаџер, изјави за Франс прес функционер на ирачкото министерство. „Префрлањето на управувањето со полето Западна Курна 2 на американска компанија би било од корист за двете страни, ќе ја зајакне стабилноста на светскиот пазар и ќе го зачува производството на нафта во Ирак“, додаде министерството.
Ексон мобил му сигнализирал на ирачкото министерство дека е заинтересиран за купувањето, изјавија за Ројтерс пет ирачки официјални извори. Американскиот гигант не сакал да коментира за таа информација, а Лукоил не одговори веднаш на барањето на Ројтерс за коментар.
Договорот за развој на полето му беше доделен на Лукоил во 2009 година, а производството во Западна Курна 2 започна пет години подоцна, според веб-страницата на руската компанија. Лукоил поседува 75 проценти од акциите во Западна Курна 2, а остатокот е контролиран од ирачката државна нафтена компанија Саут оил компани.
По воведувањето на американските санкции во октомври, Лукоил одлучи да ги продаде странските имоти, вклучително и уделот во ирачко нафтено поле. Ирачкото Министерство за нафта нема намера да го купи бидејќи Западна Курна 2 е преголем проект кој ирачките државни компании не можат да го управуваат, според ирачки експерти.
Повлекувањето на Лукоил отвора можност за западните компании, како што се американскиот Ексон мобил, британскиот БП и францускиот Тотал енерџис, да ги зголемат операциите во Ирак, ја пренесува порталот Оил енд гес изјавата на енергетскиот специјалист Набил Ал Марсуими.
Ексон мобил некогаш управуваше со нафтеното поле Западна Курна 1, а неодамна потпиша договор со Багдад за развој на нафтеното поле Маџнун и размислува да се врати во Ирак по двегодишно отсуство. Американската компанија одби да коментира за шпекулациите за купување на уделот на Лукоил во Западна Курна 2.
Кинеските компании кои веќе работат екстензивно во Ирак се исто така сериозни кандидати, според порталот Оил енд гес, издвојувајќи ја Петро Кина, истакнувајќи дека во моментов управува со полето Западна Курна 1. Минатата недела Ројтерс објави дека Багдад разгледува три потенцијални купувачи, една кинеска и две западни компании.
Интересот за купување на имотот на Лукоил „во пакет“ беше потврден минатиот месец од конгломератот Интернешнл холдинг компани“ (ИХЦ) од Обединетите Арапски Емирати, а неименувани извори изјавија дека американскиот инвестициски фонд Карлајл е исто така заинтересиран за купување на целиот имот.
Швајцарскиот трговец со енергија Гунвор ја повлече понудата, откако американското Министерство за финансии сигнализираше дека нема да издаде лиценца. Ирачката влада во меѓувреме организираше исплата на заостанати плати на работниците во Западна Курна 2 за да се обезбеди континуирано производство, изјавија тројца ирачки енергетски претставници.
Американските санкции му го отежнаа на Лукоил префрлањето пари во Ирак, објаснуваат тие. Багдад исплатил две заостанати месечни плати и платата за декември во ирачки динари. Западна Курна 2 е клучен за ирачкиот извоз, а другите ирачки полиња не можат никако да ги компензираат неговите барели со оглед на моменталните ограничувања на капацитетот, објаснија изворите.
Руската компанија досега им плаќала на ирачките вработени во Западна Курна 2 месечни банкарски трансфери, според Ројтерс. Производството во Западна Курна 2 останува стабилно на околу 460.000 до 480.000 барели нафта дневно, соопштија официјални лица минатата недела.
Ирак е втор на ранг-листата на водечки производители во Организацијата на земјите извознички на нафта (ОПЕК), веднаш зад Саудиска Арабија, а продажбата на сирова нафта сочинува 90 проценти од буџетските приходи на Ирак. Во моментов, Ирак извезува 3,4 милиони барели нафта дневно. Нафтата од Западна Курна 2 сочинува 0,5 проценти од светското производство и околу девет проценти од ирачкото.
