Клучен дел од планот на Трамп од 20 точки за мир во Газа е тој што Соединетите Американски Држави, заедно со арапските и другите партнерски земји, ќе формираат привремени сили за обука и поддршка на палестинската полиција и соработка со Египет и Јордан.
САД истакна дека американски војници нема да влезат во Газа, туку ќе дејствуваат од координативен центар кој ќе се наоѓа во северен Израел, во близина на границата со Газа. Таму ќе бидат распоредени и египетски, катарски и емиратски офицери. Египетските сили моментално учествуваат во пронаоѓањето на телата на мртвите заложници во Газа.
„Овие три земји покажаа најголем интерес за учество, но никој сè уште не дал официјална потврда“, кажа американскиот функционер.
Планот на Трамп предвидува дека меѓународните сили за стабилизација ќе бидат привремени и насочени кон обука на палестинските безбедносни структури, со цел на крајот да се овозможи разоружување на Хамас и реконструкција на Газа.
Но, многу дипломати и аналитичари изразуваат сомнеж дека планот ќе заживее по сегашната фаза – прекинот на огнот и размената на заложници меѓу Хамас и Израел.
„Од моментот кога ќе се донесе одлука за тоа кои земји ќе учествуваат, треба да сметате на два до три месеци до самото формирање на силите“, кажа Ден Шапиро, поранешен висок функционер на Пентагон за Блискиот Исток во администрацијата на Џо Бајден. Белата куќа и амбасадите на Индонезија, Пакистан и Азербејџан сè уште не ги коментираа преговорите.
Според достапните информации, САД веќе испратиле 200 војници во Израел за да помогнат во координирањето на одржувањето на прекинот на огнот и стабилизирањето на регионот. Овие војници, под команда на Централната команда на САД (ЦЕНТКОМ), ќе дејствуваат од цивилно-воен координативен центар во Израел.
Поранешен американски функционер предупреди дека соработката со Индонезија и Азербејџан ја комплицира ситуацијата бидејќи тие земји не спаѓаат под зоната на одговорност на ЦЕНТКОМ. Пентагон не ги коментираше обвинувањата.
Хамас се согласи на мировниот договор на 8 октомври и ги ослободи своите 20 преостанати живи заложници претходно оваа недела, но досега предаде само седум тела од вкупно 28 лица кои починале во заробеништво. Израел тврди дека со тоа Хамас го крши договорот.
Американскиот претседател Доналд Трамп изјави во вторникот дека верува оти Хамас ќе се согласи на разоружување. „Сите велат дека нема да се разоружаат. Ќе се разоружаат. Разговарав со Хамас и им кажав: „Дали ќе се разоружите?“ Тие рекоа: „Да, господине, ќе се разоружиме“. Ако не, ние ќе ги разоружиме“, рече Трамп.
Според поранешниот функционер Шапиро, дефинирањето на идната стабилизациска мисија е клучно за сега да се покаже дека планот се движи напред. „Важно е да се покаже елан – да се идентификуваат земјите, да се договори мандатот и структурата и да се докаже дека војниците навистина се подготвуваат за распоредување“, кажа тој.
