Херцог ја посетува Австралија оваа недела по покана на австралискиот премиер Ентони Албаниз, по пукањето на 14 декември на настан по повод Ханука на плажата Бонди во Сиднеј, во кое беа убиени 15 лица.
Посетата предизвика гнев кај дел од австралиската јавност, кои го обвинуваат Херцог дека е соучесник во цивилните жртви во Газа. Пропалестински групи организираа протести во градови и места низ земјата во понеделникот, пренесе Ројтерс.
Во Сиднеј, илјадници се собраа на плоштад во централниот деловен округ на градот, слушајќи говори и извикувајќи пропалестински слогани.
„Масакрот во Бонди беше страшен, но од нашето австралиско раководство немаше никакво признавање на палестинскиот народ и на жителите на Газа“, изјави Џексон Елиот, 30-годишен демонстрант од Сиднеј.
„Херцог ги избегнува сите прашања за окупацијата и вели дека оваа посета е за односите меѓу Австралија и Израел, но тој е соучесник.“
Присуството на полицијата беше силно, со хеликоптер што кружеше над главите и полицајци што патролираа на коњи.
Полицијата употреби лут спреј и солзавец за да ги оттурне групите луѓе што се обидуваа да ја пробијат линијата и да продолжат со маршот. Неколку демонстранти беа уапсени по судирите со полицијата.
Властите во Сиднеј ја прогласија посетата на Херцог за настан од големо значење и добија овластување да користат ретко применувани мерки за време на посетата, вклучително и можност за раздвојување и преместување на толпи, ограничување пристап до одредени подрачја, наредби луѓето да се разотидат и претресување возила.
Во понеделникот, на суд во Сиднеј, Палестинската акциска група – која го организираше протестот – не успеа правно да ги оспори ограничувањата за демонстрацијата.
Претседателот им оддаде почит на загинатите
Во меѓувреме, илјадници членови на еврејската заедница, владини претставници и политичари од опозицијата го пречекаа Херцог на настан, повеќе од еден километар оддалечен од протестите, на кој им беше оддадена почит на жртвите од нападот во Бонди.
„Сите ги паметиме бојкотите, заканите, колегите што им свртеа грб на своите еврејски пријатели… тоа беше увертира за Бонди“, им рече тој на присутните во Сиднејскиот меѓународен конгресен центар, според извештај на Еј-би-си њуз.
Херцог ја започна посетата порано во понеделникот на плажата Бонди, каде што положи венец на спомен-обележјето за жртвите од нападот. Тој се сретна и со преживеаните и со семејствата на 15-те убиени во пукањето.
„Ова беше и напад врз сите Австралијци. Нападнати беа вредностите што нашите демократии ги ценат – светоста на човечкиот живот, слободата на вероисповед, толеранцијата, достоинството и почитта“, изјави Херцог на местото на настанот.
Во соопштение, коизвршниот директор на Извршниот совет на австралиското еврејство, Алекс Ривчин, изјави дека посетата на Херцог „ќе го подигне духот на една заедница што е во болка“.
Еврејскиот совет на Австралија, отворен критичар на израелската влада, во понеделникот објави отворено писмо потпишано од повеќе од 1.000 еврејски австралиски академици и лидери на заедницата, со кое го повикуваат Албаниз да ја повлече поканата до Херцог.
