„Целосно го осудувам тоа, целосно е неприфатливо и непотребно. Воопшто не ги разбирам причините и потребата да се направи тоа. Повторно е нанесена огромна штета, пред сè на хрватската држава и хрватските интереси“, изјави Анушиќ пред новинарите по конференцијата „Хрватска одбранбена индустрија 2025“.
Апсолутно нема причина културата, без разлика дали е таа хрватска, српска, македонска или американска, да се споменува како некаков проблем, истакна тој и додаде дека секое „сведоштво за култура“ е добредојдено, пренесува ХИна.
„Секој што сведочи на културата, ја живее, кој сака да ја претстави својата култура, без разлика дали на својата заедница или на хрватската јавност, секако немам ништо против тоа. Тоа е во секој случај добредојдено“, кажа тој.
Полицијата спроведува истрага за тоа кој бил во групата луѓе кои ја прекинаа програмата на Денот на српската култура, а Анушиќ се надева дека истрагата ќе утврди кој бил „идеологот“ за да тоа да се направи. „Тоа можеби е најинтересното нешто што треба да се чуе“, кажа тој.
Новинарските прашања беа поврзани и со причините кои довеле до инцидентот во Сплит, односно дали една од нив е одржувањето на концертот на Марко Перковиќ Томпсон во Загреб, но министерот го отфрли тоа. Тој смета дека објаснувањето на причините за ваквите инциденти бара подолга елаборација, првенствено социолошка, а исто така верува дека би било добро да има што е можно помалку „за дом спремни“ теми.
„Колку помалку теми „за дом спремни“ и на сите ќе им биде подраго, полесно и подобро сè ќе функционира во земјата. Тоа е тотално неважна тема, која нема никаква врска со секојдневниот живот и иднината на Хрватска. Пуштете нека оди таму каде што ѝ е местото, во музеите, по ѓаволите“, кажа тој на крајот од изјавата.
Претходно новинарите го прашаа за неговиот коментар за одржувањето на тркалезна маса во хрватскиот парламент за жртвите од усташкиот логор Јасеновац во Втората светска војна, која ја организираше парламентарниот клуб на Домино и Хрватските суверенисти. Односно, дали треба да му се дадат поголеми овластувања на претседателот на парламентот Јандроковиќ да може да забрани одржување на вакви собири во парламентот.
„Таа тркалезна маса сигурно не требаше да биде таму“, кажа Анушиќ и додаде дека Јандроковиќ не можел да го забрани собирот. „Тркалезните маси ги свикуваат пратениците и тие не мора да го информираат претседателот на парламентот за тоа. Тој не е виновен за таа тркалезна маса, туку оној што ја свикал и ја организирал е виновен, или заслужува или е одговорен“, оцени тој.
А за зголемување на овластувањата на претседателот на парламентот, тој кажа дека нема ништо против тоа, ако парламентарното мнозинство одлучи така, додавајќи дека тој не е во парламентот туку во владата.
