Стотици луѓе од Меѓумурје и Вараждин ја преминуваат границата во потрага по поповолни намирници во словенечките продавници.
Инфлацијата и постојаниот раст на цените на основните животни намирници во Хрватска натераа многумина да побараат алтернативи. Словенија се покажа како вистинско решение, иако до пред неколку години таквиот шопинг беше резервиран за повремени посети, сега е дел од секојдневието.
Во Ормож се сконцентрирани бројни трговски ланци кои нудат конкурентни цени. Храната, домашните продукти, па дури и свежото месо и млечните производи, често се значително поевтини отколку во Хрватска.
Многу купувачи тврдат дека и покрај трошоците за патот, купувањето во Словенија поприлично им се исплати.
Додека Словенците бележат раст на прометот во своите продавници, економистите предупредуваат дека масовното заминување на Хрватите во странство за шопинг може дополнително да ја наруши домашната економија.
Сепак, за просечниот граѓанин, снаоѓањето и барањето поповолни цени во моментов е приоритет.
