„Пред два дена добивме предлог од посредниците во Египет и Катар. Позитивно се позанимававме со него и го прифативме“, кажа Халил ал Хаја во телевизиски говор, пренесува Ројтерс.
Ал Хаја го предводи преговарачкиот тим на Хамас во индиректните преговори насочени на обезбедување примирје во војната на Хамас и Израел во Газа која почна во октомври 2023.
Безбедносни извори кажале за Ројтерс дека Египет добил позитивни индикации од Израел за новиот предлог за прекин на огнот кој би вклучувал преодна фаза.
Се предлага Хамас да ослободи по пет израелски заложници секоја недела, кажале изворите.
Кабинетот на израелскиот премиер соопшти дека одржал серија консултации за предлогот кој го добил од посредниците и дека Израел им пренел на посредниците контрапредлог во целосна координација со САД.
Кабинетот на израелскиот премиер не одговорил веднаш на прашањето на Ројтерс дали се согласиле на предлогот за прекин на огнот.
Израел пред десетина дена продолжи со интензивни воздушни напади низ Газа, проследени со копнени операции, откако дојде до застој во преговорите за продолжување на примирјето со палестински Хамас.
Министерството за здравство во Газа соопшти на 24 март дека 730 луѓе се убиени откако Израел го продолжи бомбардирањето на 18 март.
