Две видеа на кои се гледа 24-годишниот Евјатар Давид беа објавени откако американскиот специјален пратеник, Стив Виткоф го посети местото за помош во Газа и се сретна со семејствата на заложниците. ОН наведуваат дека гладот низ Појасот е последица на израелската блокада.
Сега 24-годишникот изгледа како скелет, неговите плешки штрчат од грбот, а во видеото вели дека не јадел три дена. Вознемирувачка снимка покажува како тој навидум го копа сопствениот гроб.
Тој работел во ресторан, според видеото објавено од здружението „Пријатели на трудот на Израел“, пред да биде киднапиран од музичкиот фестивал „Нова“ на 7 октомври 2023 година. Оттогаш тој е приведен во Газа, а снимките покажуваат дека е држен во темни тунели каде што преживува од скудни оброци леќа и грав.
Газа страда од „масовен глад предизвикан од човекот“ поради израелската блокада на хуманитарна помош за енклавата, претходно изјави шефот на Светската здравствена организација (СЗО).
Во видео објавено вчера, Давид, според англискиот превод, вели дека не јадел три дена. „Нема доволно храна. Едвај добивам вода за пиење“, додаде тој. Видеото го прикажува како зборува за тоа што јадел во јули, што е снимено на рачно изработен календар закачен на ѕидот од подземен тунел во Газа. „Ми даваат што можат да добијат“, рече тој.
На крајот од снимката, тој копа дупка. „Ова е гробот во кој мислам дека ќе бидам закопан. Времето истекува“, се вели во преводот. Потоа тој паѓа, клекнувајќи на подот и потпирајќи ја главата на раката, сè уште држејќи ја лопатата.
„Принудени сме да го гледаме нашиот сакан син и брат Евјатар Давид како намерно и цинично умира од глад во тунелите на Хамас во Газа. Жив скелет, закопан жив. Нашиот син во неговата сегашна состојба има само уште неколку дена живот“, изјави неговото семејство.
„Израел и меѓународната заедница мора да се спротивстават на суровоста на Хамас и да обезбедат нашиот Евјатар веднаш да добие соодветна исхрана. Намерното гладување, тортурата и злоупотребата на Евјатар за пропагандни цели ги кршат дури и најниските стандарди на хуманитарното право и основното човечко достоинство“, рекоа тие.
Хамас ги зеде заложниците за време на нападот на 7 октомври 2023 година, на фестивал на кој присуствуваа илјадници луѓе, при што беа убиени над 200 лица.
