На прашањето дали САД треба да го преиспитаат своето воено партнерство со Израел, Њусом одговори потврдно. „Срцето ми се крши затоа што сегашното раководство во Израел нè води во насока каде што мислам дека немаме друг избор освен да го преиспитаме тоа“, кажа тој.
„Да се тврди дека ова е во американски интерес во време кога трошоците за живот се на кризно ниво, додека имаме администрација која беше избрана кажувајќи дека тоа е токму спротивното од она што некогаш би го разгледале… Фактот дека сме во оваа регионална војна со сите овие посредници, сите овие измами и корупција се исто така огромен дел од приказната – тоа е вистински разговор што треба да го водиме“, додаде Њусом.
Коментарот за „апартхејдот“ дојде откако модераторот на настанот, водителот на подкастот „Под сејв Америка“, Џон Фавро, го праша за израелскиот премиер Бенјамин Нетанјаху. Гувернерот го цитираше колумнистот на Њујорк тајмс Томас Фридман, кој напиша дека војната може да го турне Нетанјаху кон изборна победа што ќе поттикне уште поголем екстремизам во Израел, спротивно на американските интереси.
„Прашањето за Биби е интересно затоа што тој има свои домашни проблеми“, кажа Њусом. „Тој се обидува да избегне затвор. Му претстојат избори. Потенцијално е на колена. Има тврдокорни кои сакаат да го анектираат Западниот брег. Фридман и другите соодветно зборуваат за тоа, споменувајќи некаков вид држава на апартхејд“, кажа тој.
Неговите коментари доаѓаат во време на опаѓање на поддршката за Израел кај пошироката јавност, а особено кај демократите, кои сè повеќе го гледаат ова прашање како одвраќање на гласачите пред претстојните среднорочни избори. Анкета на Галуп спроведена минатиот месец покажа дека 41 отсто од Американците сега повеќе сочувствуваат со Палестинците отколку со Израелците во врска со ситуацијата на Блискиот Исток.
Во ниедна претходна анкета за повеќе од 25 години, Израелците, кои сега имаат 36 отсто поддршка, не заостанале во општата поддршка. Меѓу демократските гласачи, разликата е многу поголема. Галуп откри дека 65 отсто од нив повеќе сочувствуваат со Палестинците, а само 17 отсто со Израелците.
Ова не е прв пат Њусом да хо критикува Нетанјаху или одлуката Доналд Трамп да се здружи со Израел во нападот на Иран за време на неговата турнеја за промовирање на книгата. Во саботата тој го обвини американскиот претседател дека „ја удвојува глупоста“ за време на неговото обраќање за состојбата на нацијата пред Конгресот и кажа дека желбата на Трамп за ангажирање на американската војска во Иран произлегува од „слабост маскирана како сила“.
Во разговор во јануари со конзервативниот подкастер Бен Шапиро Њусом кажа дека е „кристално јасен во својата љубов кон Израел и во својата осуда на Биби, и дека има разлика“.
Во тоа време тој кажа дека може да разбере зошто луѓето веруваат, врз основа на сликите од израелската војна во Газа, дека Израел извршил геноцид таму, но дека не го дели тој став, иако кажа дека воената акција на Израел била „несразмерна“. „Имам многу забелешки за начинот на кој Биби ја водеше војната. Не ми се допадна начинот на кој зборуваше за палестинскиот народ“, кажа Њусом.
