„Израелската влада постојано напредува со мерки за целосно уништување на Појасот Газа и извршување на подмолна анексија на Западниот Брег“, изјави Гутереш за Франс прес.
Со признавањето на палестинската држава планирано за понеделник на самитот на ОН од страна на Франција и неколку други земји, израелските официјални лица отворено му се заканија на Париз со дипломатски мерки, како и со анексија на Западниот Брег, кој Израел го окупира од 1967 година.
Но, за Гутереш, без разлика каков „изговор“ користи Израел за својата политика на палестинските територии или против земјите кои покажуваат поддршка за палестинска држава, тоа всушност е „константна, чекор-по-чекор акција на владата на Израел да ги спречи Палестинците да имаат држава“.
„Затоа не смееме да се чувствуваме заплашени од ризикот од одмазда, бидејќи без разлика што ќе направиме, овие акции ќе продолжат“, рече Гутереш.
„Мислам дека е важно тие (Израел) да се чувствуваат сè поизолирани за да се променат“, додаде генералниот секретар на ОН, жесток поддржувач на решението за две држави и за Израел и за Палестина.
Тој ја опиша можноста за понатамошно признавање на Палестина како „исклучително важен симбол за палестинскиот народ“.
Гутереш повика на прекин на огнот во Појасот Газа.
„Она што го гледаме во Газа е ужасно. Тоа е најлошото ниво на смрт и уништување што сум го видел откако станав генерален секретар, веројатно во целиот мој живот“, додаде Гутереш.
„Цврсто верувам дека тоа е морално, политички и правно неприфатливо“, рече тој, одбивајќи да го употреби зборот „геноцид“ во отсуство на судска одлука за ова прашање.
