Кан кажа дека „живее без кирија во главата на Трамп откако американскиот претседател го искористи својот говор на Генералното собрание на Обединетите нации вчера за да ја критикува Британија, со специјален акцент на Лондон.
Трамп продолжи со својата долгогодишна критика кон Кан, велејќи дека главниот град на Британија го води „ужасен градоначалник“ кој го „променил“ градот. Меѓу неговите најнеобични тврдења беше дека во Лондон се применува шеријатски закон, за што нема докази.
„Го гледам Лондон, каде што имате ужасен градоначалник, ужасен, ужасен градоначалник. И градот е променет, толку многу е променет“, кажа Трамп: „Сега сакаат да воведат шеријатски закон. Но, вие сте во друга земја, не можете да го направите тоа.“
На прашањето за коментар за нападите од американскиот претседател, Кан кажа: „Мислам дека претседателот Трамп покажа дека е расист, дека е сексист, дека е мизогинист и дека е исламофоб“. Тој продолжи кажувајќи дека јавноста треба „да се праша што е тоа со овој муслимански градоначалник кој раководи со либерален, мултикултурен, прогресивен и успешен град што го прави да изгледа како да живеам во главата на Доналд Трамп без кирија“.
Трамп го обвини Кан и за порастот на криминалот во Лондон, за кој тврди дека „се зголемил нагло“, и го нарече „катастрофа“ околу прашањето на имиграцијата. Овие коментари, дадени во претседателскиот авион Ерфорс уан на враќањето кон Вашингтон, предизвикаа остра реакција од кабинетот на градоначалникот на Лондон.
„Лондон е најголемиот град во светот, побезбеден од големите американски градови и ние сме воодушевени што можеме да пречекаме рекорден број американски граѓани кои се преселуваат тука“, кажа портпаролот на Кан.
Затегнатите односи меѓу Кан и Трамп траат со години, а сè почна уште во 2015 година, кога американскиот претседател повика на „целосна и комплетна забрана“ за влез на муслимани во Соединетите Американски Држави.
