За време на посетата на Блискиот Исток, Вадефул рече дека сака да придонесе за деескалација на конфликтот меѓу Иран и Израел, истакнувајќи дека Техеран претходно пропуштил можност за конструктивни преговори.
„Се надевам дека тоа сè уште не е изгубено“, изјави Вадефул за АРД во саботата навечер.
„Германија, заедно со Франција и Велика Британија, е подготвена. Му нудиме на Иран итни преговори за нуклеарната програма. Се надевам дека оваа понуда ќе биде прифатена“, додаде тој.
„Исто така, клучен предуслов за смирување на овој конфликт е Иран да не претставува закана за регионот, државата Израел или Европа“, истакна тој.
Вадефул, кој ќе биде во Оман во недела, предупреди дека конфликтот може да се заврши само ако сите актери извршат притисок и врз Иран и врз Израел.
„Постои заедничко очекување дека во текот на следната недела мора да се направи сериозен обид од двете страни за да се прекине спиралата на насилство“, рече тој.
На прашањето дали верува дека иранската влада може да падне, Вадефул рече дека не верува оти Израел има намера да ја собори владата во Техеран.
Зборувајќи за Газа, германскиот министер рече дека хуманитарната ситуација во палестинската енклава е неприфатлива и го повика Израел да дозволи неограничен пристап за хуманитарните организации.
„Гладот, умирањето и страдањето на луѓето во Газа мора да престанат“, рече тој, додавајќи дека Хамас е одговорен за конфликтот и дека исламистичката група мора да ги ослободи заложниците што ги држи од нападот врз Израел во октомври 2023 година.
