Според одговорот на германското Министерство за здравство на прашање од партијата Зелените, објавен во четвртокот, околу половина од речиси шест милијарди маски биле испратени на „термичка обработка“, процес на рециклирање што вклучува согорување за производство на енергија.
Владата досега потрошила околу осум милиони евра за рециклирањето, кое го спроведуваат компании избрани преку постапка на јавна набавка.
Масовното уништување на неискористената медицинска опрема повторно отвори жестока политичка дебата за начинот на кој министерството ги троши средствата.
Федералниот ревизорски суд на Германија во 2024 година утврди дека Министерството за здравство купило 5,7 милијарди маски за околу 5,9 милијарди евра, иако „реалната побарувачка за време на пандемијата на ковид-19 била значително помала“.
Германското списание Шпигл во четвртокот објави дека се очекува дополнителни 85 милиони маски да бидат уништени до крајот на 2026 година, кога ќе им истече рокот на употреба.
Покрај тоа, 360 милиони маски сè уште се чуваат во магацини, бидејќи околу нив се водат правни спорови меѓу сојузната влада и добавувачите, кои бараат да им бидат намирени неплатените сметки. Се очекува и поголем дел од овие складирани маски со текот на времето да бидат уништени.
Според податоците на владата што ги пренесува Шпигл, за време на пандемијата биле дистрибуирани само 2,12 милијарди маски.
