Помошничката на генералниот секретар, Марта Поби, на состанокот изјави дека Гутереш апелира на воздржување од „какви било дејствија што би можеле да доведат до дополнителна загуба на човечки животи“ и предупреди дека евентуални воени напади врз Иран би додале „уште поголема нестабилност во веќе запаливата ситуација“.
Таа нагласи дека генералниот секретар ги потврдува принципите на Повелбата на Обединетите нации, според кои споровите мора да се решаваат по мирен пат.
На состанокот присуствуваше и Масих Алинежад, една од најгласните ирански дисидентки во Соединетите Американски Држави. Таа во своето обраќање ги обвини Обединетите нации и Советот за безбедност дека не одговориле со „алармантноста што ја бара моментот“.
Алинежад, која присуствуваше по покана на САД, изјави дека членовите на Советот за безбедност ги „заборавиле привилегијата и одговорноста“ што ги носи членството во тоа тело.
Во октомври двајца руски криминалци беа осудени на по 25 години затвор затоа што ангажирале платен убиец да ја ликвидира Алинежад во нејзиниот дом во Бруклин, по налог на иранските власти, наведува АП.
Техеран, пред седницата на Советот за безбедност, даде поблаги изјави со цел да ја смири ситуацијата, откако претседателот на САД Доналд Трамп се закани дека ќе преземе мерки за да ги запре натамошните убиства на демонстранти.
Портпаролката на Белата куќа Каролин Левит пред почетокот на состанокот изјави дека за Трамп „сите опции и понатаму се на маса“.
Американскиот амбасадор во Обединетите нации, Мајк Волц, за време на дискусијата во Советот за безбедност изјави дека САД го поддржуваат „храбриот народ на Иран“ и дека Трамп „јасно ставил до знаење дека сите опции се на маса за да се запре масакрот“, јави агенцијата Ројтерс.
