Тимовите со беспилотни летала што се натпреваруваат за поени во рамките на системот „Бонус на армијата на беспилотни летала“ во септември убија или ранија 18.000 руски војници, а сега се натпреваруваат 400 единици со беспилотни летала – значително зголемување од 95 во август, соопштија украинските власти.
Системот, лансиран пред повеќе од една година, ги наградува војниците што остваруваат напади со поени што можат да се заменат за купување оружје од онлајн продавницата Брејв1 (Brave1), опишана како „Амазон за војна“, која располага со повеќе од 100 различни беспилотни летала, автономни возила и друга опрема за војување со беспилотни летала. Исто така, постои и список на врвни тимови, предводени од тимови наречени Ахил и Феникс.
„Стана навистина популарно меѓу единиците“, рече Федоров, истакнувајќи дека тоа е јасен пример за растечката автоматизација на војувањето. „Сите одбранбени сили знаат за ова и постои конкуренција за поени, за добивање на овие беспилотни летала, системи за електронско војување и други работи што помагаат во борбата. Колку повеќе непријателска пешадија убиваат, толку повеќе беспилотни летала добиваат за да убијат повеќе непријателска пешадија. Тоа станува циклус што самиот себеси се храни.“
Бројот на руските жртви во септември беше двојно поголем од оној во октомври минатата година, делумно затоа што владата во Киев ги дуплираше наградите за убивање руски пешадијци од шест на 12 поени, што ги одразува променетите приоритети на фронтот.
Украинските разузнавачки служби сугерираат дека Русија можеби развива свој систем во стилот на игра, рече тој. Украина го проширува својот пристап „поени за убиства“ и на артилериските единици, доделувајќи поени за успех што можат да се користат за купување ново оружје. Извидничките единици добиваат поени за откривање цели, а логистичките тимови почнаа да добиваат поени со користење автономни возила наместо луѓе за снабдување на фронтовските линии.
Федоров открива дека украинската војска дополнително ја охрабрува употребата на беспилотни летала што се делумно контролирани од вештачка интелигенција, што сугерира избор на цел и ги управува последните моменти од летот на дронот за да се зголеми точноста на нападите.
Проширувањето на системот базиран на поени доаѓа по предупредувањата дека зголемената зависност од војување со беспилотни летала не е модел што земјите-членки на НАТО треба да го следат, бидејќи Русија развила исклучително силна одбрана од вакви беспилотни напади.
Извидничките единици заработуваат поени за она што го нарекуваат „убер-наведување“, алузија на глобалната апликација за превоз.
„Во основа, поставувате точка на мапата, како што би се поставиле себеси на мапата на Убер кога нарачувате превоз – само што наместо возило, целта ја погодува од беспилотно летало од друга единица“, објасни тој.
Меѓутоа, проширувањето на системот базиран на поени доаѓа со предупредувања дека зголемената зависност од војувањето со беспилотни летала не е модел што земјите од НАТО треба да го следат, бидејќи Русија разви исклучително силна одбрана од вакви беспилотни напади. Експертите од лондонскиот институт Ројал јунајтед сервисес неодамна повикаа на префокусирање кон конвенционалната артилерија и авијација.
Покрај удвојувањето на бројот на поените за убиената пешадија – што ја одразува нивната зголемена употреба во војската – убивањето оператор на руско беспилотно летало сега носи 25 поени, додека заробувањето руски војник со беспилотно летало носи 120 поени, што ја одразува потребата на Украина од воени заробеници за трговија со непријателот. Украинската влада ја одобрува висината на поените, но, вели Федоров, тие сега се „скоро целосно лишени од емоции“ во проценката на вредноста на човечките животи.
„Во војна сме четири години и тоа е тешко“, рече тој. „Само бараме начини да бидеме поефикасни. Ова го гледаме како дел од нашата секојдневна работа. Тука има малку или воопшто нема емоционална контрола. Сето тоа се чувствува како техничка работа. Бидејќи ако не го запрете непријателот, тој ќе ги убие вашите војници, а откако војниците ќе умрат, ќе дојде во градот и ќе освојува, ќе разорува и ќе убива цивили.“
Украинските оператори на беспилотни летала понекогаш се стационирани на само 250 метри од фронтовската линија, а понекогаш и 3 километри подалеку, каде што седат скриени пред компјутерите и вршат директни напади, понекогаш користејќи контролери за видеоигри. Ахил е еден од десетте најуспешни дроновски полкови, а дејствува во источниот дел на Харковската и Доњецката област. Неговиот командант, Јуриј Федоренко, рече дека најдобрите пилоти не се нужно оние што се вешти во видеоигри.
„Дисциплинираните луѓе се најдобрите пилоти“, рече тој. „Секако, ако сте помлади, можете да останете будни подолго и ви треба помалку време за да заздравите. Но ако некое лице е дисциплинирано, тоа е добар оператор на беспилотни летала.“
Тој, исто така, го намали значењето на тврдењето дека станува збор за „гејмификација“ на војната, бидејќи понекогаш наредбите биле да се уништат цели со мал број поени за да се поддржи некоја краткорочна тактичка цел.
„Пред сѐ, мора да ја исполниме задачата, бидејќи ова е војна“, рече тој. „Тоа мора да го правиме, а не да бркаме поени.“
Друг командант на единица за беспилотни летала, Андриј Полторацки, рече: „Целата единица учествува во натпреварот. Операторите на беспилотни летала се натпреваруваат едни со други. Групи оператори се натпреваруваат со други групи. Дури и највисоките команданти се натпреваруваат меѓусебно.“
Тој тоа го окарактеризира како здрава конкуренција, а не забава, и рече дека штом Русите ќе почнат офанзива, „натпреварот престанува и сите… работат заедно“ на тоа што најдобро ги штити животите на Украинците, без оглед на понудените поени.
Системот на доделување поени за убиства ѝ обезбеди на Украина богатство од податоци, благодарение на кои, како што рече Федоров, „сè повеќе ја разбираме математиката на војната“.
„Благодарение на поените, всушност почнуваме да разбираме повеќе за тоа што се случува на бојното поле“, рече тој. „За да добијат поени, (единиците со беспилотни летала) мора да прикачат видеоснимки како потврда. На тој начин добиваме претстава за тоа кои цели биле погодени, каде биле погодени во однос на фронтовската линија и кои беспилотни летала и други средства биле користени.
На тој начин можеме да видиме што е повеќе, а што помалку ефикасно. Секој го гледа списокот на најдобрите, па единиците почнуваат да учат едни од други. Поискусните сега тренираат и го отвораат патот за оние што сè уште се развиваат… иновациите доаѓаат одоздола, од теренот.“
