Администрацијата на претседателот на Соединетите Американски Држави Доналд Трамп планира да изгради воена база за 5.000 луѓе во Газа, која би се простирала на повеќе од 350 хектари, се наведува во документите од договор на Одборот за мир што ги видел британскиот весник Гардијан.
Локацијата е замислена како оперативна воена база за идните Меѓународни стабилизациски сили, планирани како мултинационална воена формација. Меѓународните стабилизациски сили се дел од новоформираниот Одбор за мир, кој треба да управува со Газа. Со Одборот за мир претседава Трамп, а делумно го води и неговиот зет Џаред Кушнер.
Плановите во кои Гардијан имал увид предвидуваат фазна изградба на воено упориште со димензии 1.400 на 1.100 метри, опкружено со 26 оклопни набљудувачки кули монтирани на приколки, стрелиште за лесно вооружување, бункери и складиште за воена опрема за операции. Целата база ќе биде оградена со боцкава жица.
Утврдувањето е планирано на сув појас рамнини во јужна Газа, обраснат со грмушеста вегетација отпорна на сол и бели диви грмушки и покриен со искривен метал од долгогодишното израелско бомбардирање. Гардијан ја прегледал снимката од тоа подрачје. Извор близок до планирањето изјавил за Гардијан дека на помала група понудувачи — меѓународни градежни компании со искуство во воени зони — тоа подрачје веќе им било покажано при обиколка на теренот.
Наводно индонезиската влада понудила да испрати до 8.000 војници. Претседателот на Индонезија бил еден од четворицата лидери од Југоисточна Азија планирани да присуствуваат на инаугурацискиот состанок на Одборот за мир во Вашингтон в четврток.
Советот за безбедност на Обединетите нации го овластил Одборот за мир да воспостави привремени Меѓународни стабилизациски сили во Газа. Според Обединетите нации, задачата на тие сили ќе биде обезбедување на границата на Газа и одржување мир во областа. Исто така треба да ги штитат цивилите и да обучуваат и поддржуваат „проверени палестински полициски сили“.
Не е јасно какви би биле правилата на ангажирање на тие сили во случај на борби, евентуалното идно бомбардирање од Израел или напади од Хамас. Исто така не е јасно каква улога треба да имаат во разоружувањето на Хамас, што е израелски услов за продолжување на обновата на Газа.
Иако повеќе од 20 земји се пријавија како членки на Одборот за мир, поголем дел од светот остана настрана. Иако организацијата е воспоставена со одобрение на Обединетите нации, нејзиниот статут, се чини, му дава на Доналд Трамп трајно лидерство и контрола.
„Одборот за мир е своевидна правна фикција, номинално со сопствен меѓународноправен субјективитет одвоен и од Обединетите нации и од Соединетите Американски Држави, но во стварноста е само празна школка што САД ја користат како што им одговара“, вели Адил Хак, професор по право на Универзитетот Ратгерс.
Некои стручњаци велат дека структурите на финансирање и управување се нејасни, а повеќе изведувачи рекле за Гардијан дека разговорите со американските службеници често се водат преку апликацијата Сигнал, наместо преку официјалната владина електронска пошта.
Документот за договарање на изградбата на воената база го издал Одборот за мир, според лице запознаено со процесот, а бил подготвен со помош на американски службеници за јавни набавки.
Во плановите се наведува дека треба да постои мрежа од бункери, секој со димензии шест на четири метри и висина 2,5 метри, со сложени системи за вентилација во кои војниците можат да се засолнат за заштита.
„Изведувачот“, се наведува во документот, „мора да спроведе геофизичко испитување на локацијата за фазно да идентификува евентуални подземни празнини, тунели или големи подземни шуплини.“ Оваа одредба веројатно се однесува на големата мрежа тунели што Хамас ги изгради во Газа.
Еден дел од документот опишува „Протокол за човечки останки“.
„Ако се откријат сомнителни човечки останки или културни артефакти, сите работи во непосредна близина мора веднаш да престанат, подрачјето мора да се обезбеди, а договорниот службеник веднаш да биде известен за понатамошни упатства“, се наведува.
Според агенцијата за цивилна одбрана на Газа, се верува дека под урнатините во Газа се затрупани телата на околу 10.000 Палестинци.
Не е јасно кој е сопственик на земјиштето на кое треба да се изгради воениот комплекс, но голем дел од јужна Газа моментално е под израелска контрола. Обединетите нации проценуваат дека за време на војната биле раселени најмалку 1,9 милиони Палестинци.
Дајана Буту, палестинско-канадска правничка и поранешна мировна преговарачка, оцени дека изградбата на воена база на палестинска земја без одобрение од властите е чин на окупација. „Од кого добиле дозвола да ја градат таа воена база?“
Службеници на американската Централна команда сите прашања за воената база ги пренасочиле кон Одборот за мир.
Еден службеник на администрацијата на Трамп одбил да зборува за договорот за воената база: „Како што рече претседателот, ниедна американска чизма нема да биде на терен. Нема да коментираме протечени документи.“
