Хуманитарните организации го преполовија количеството храна што им се дели на семејствата, а многу нивни припадници не можат да се движат поради израелското бомбардирање.
Светската програма за храна (ВФП) соопшти дека резервите на брашно се доволни само за исхрана на 800.000 луѓе дневно до вторник, а дека сите резерви на храна ќе траат најмногу две недели. Како последно средство кога ќе се исцрпи сета друга храна ги имаат резервите на нутритивни кекси само за 415.000 луѓе.
Хуманитарните работници ги делат сите резерви што ги имаат, но предупредуваат за катастрофален пораст на глад и неисхранетост. Набрзо храната сосема ќе исчезне ако не се обнови приливот на помошта, зашто војната го уништи речиси целото локално производство на храна во Газа.
Горивото и лековите ќе „траат“ неколку недели подолго, пред и нив сосема да ги снема. Болниците ги штедат антибиотиците и лековите против болки. Групите за помош веќе праќаат ограничени резерви гориво за превоз на помошта, за бунарите и за постројките за десалинизација за производство на вода.
Израел исто така не го обнови системот за хуманитарните групи да ја известат војската за своето движење за да се обезбедат да не ги бомбардираат. Како резултат на тоа, разни групи ја запреа испораката на вода, на исхраната за неисхранетите деца и другите програми зашто не е безбедно екипите да се движат.
САД на почетокот на војната во октомври 2023 година извршија притисок врз Израел да дозволи помошта да влезе во Газа, по што Израел првпат воведе блокада. Овој пат тие ја поддржаа политиката на Израел.
Групите за човекови права ова го нарекоа „политика на изгладнување“, која претставува воено злосторство.
Израелскиот министер за надворешни работи Гидеон Сар рече дека неговата земја „се однесува според меѓународното право“. Тој го обвини Хамас дека ја краде хуманитарната помош и рече дека Израел не е обврзан да ги пушти резервите ако тие бидат пренасочени кон терористите. Не кажа кога блокадата би можела да биде укината.
